gar KHamushi se faeda iKHfa-e-haal hai

gar ḳhāmushī se fā.eda iḳhfā-e-hāl hai

ḳhush huuñ ki merī baat samajhnī muhāl hai

kis ko sunā.ūñ hasrat-e-iz.hār kā gila

dil fard-e-jama-o-ḳharch zabāñ-hā-e-lāl hai

kis parde meñ hai ā.ina-pardāz ai ḳhudā

rahmat ki uzr-ḳhvāh-e-lab-e-be-savāl hai

hai hai ḳhudā-na-ḳhvāsta vo aur dushmanī

ai shauq-e-munfa.il ye tujhe kyā ḳhayāl hai

mushkīñ libās-e-kāba alī ke qadam se jaan

nāf-e-zamīn hai na ki nāf-e-ġhazāl hai

vahshat pe merī arsa-e-āfāq tañg thā

dariyā zamīn ko araq-e-infi.āl hai

hastī ke mat fareb meñ aa jā.iyo 'asad'

aalam tamām halqa-e-dām-e-ḳhayāl hai

pahlū-tahī na kar ġham-o-andoh se 'asad'

dil vaqf-e-dard kar ki faqīroñ kā maal hai

gar KHamushi se faeda iKHfa-e-haal hai

KHush hun ki meri baat samajhni muhaal hai

kis ko sunaun hasrat-e-izhaar ka gila

dil fard-e-jama-o-KHarch zaban-ha-e-lal hai

kis parde mein hai aaina-pardaz ai KHuda

rahmat ki uzr-KHwah-e-lab-e-be-sawal hai

hai hai KHuda-na-KHwasta wo aur dushmani

ai shauq-e-munfail ye tujhe kya KHayal hai

mushkin libas-e-kaba ali ke qadam se jaan

naf-e-zamin hai na ki naf-e-ghazal hai

wahshat pe meri arsa-e-afaq tang tha

dariya zamin ko araq-e-infial hai

hasti ke mat fareb mein aa jaiyo 'asad'

aalam tamam halqa-e-dam-e-KHayal hai

pahlu-tahi na kar gham-o-andoh se 'asad'

dil waqf-e-dard kar ki faqiron ka mal hai