gar un ko bhul jaen to ganga nahaen hum

gar un ko bhuul jaa.eñ to gangā nahā.eñ ham

un ko na yaad aa.eñ to gangā nahā.eñ ham

un ko manāte ham ko to 'arsa guzar gayā

vo ham ko bhī manā.eñ to gangā nahā.eñ ham

furqat meñ un kī karvaTeñ badlī haiñ be-hisāb

un ko bhī kuchh satā.eñ to gangā nahā.eñ ham

sāgar kā ho kinārā hasīñ chāñd-rāt ho

zaanū pe vo sulā.eñ to gangā nahā.eñ ham

nafrat kī bahr meñ bhī liye pyaar kī radīf

kuchh she'r jo sunā.eñ to gangā nahā.eñ ham

kahte haiñ 'ishq meñ bhī baḌe sānehāt haiñ

gar jaan pe ban aa.eñ to gangā nahā.eñ ham

milte haiñ roz ham se baḌe ehtiyāt se

ik roz bhuul jaa.eñ to gangā nahā.eñ ham

ġham kī añdherī raat hai to 'jojī' yuuñ kareñ

kuchh diip vo jalā.eñ to gangā nahā.eñ ham

gar un ko bhul jaen to ganga nahaen hum

un ko na yaad aaen to ganga nahaen hum

un ko manate hum ko to 'arsa guzar gaya

wo hum ko bhi manaen to ganga nahaen hum

furqat mein un ki karwaTen badli hain be-hisab

un ko bhi kuchh sataen to ganga nahaen hum

sagar ka ho kinara hasin chand-raat ho

zanu pe wo sulaen to ganga nahaen hum

nafrat ki bahr mein bhi liye pyar ki radif

kuchh she'r jo sunaen to ganga nahaen hum

kahte hain 'ishq mein bhi baDe sanehat hain

gar jaan pe ban aaen to ganga nahaen hum

milte hain roz hum se baDe ehtiyat se

ek roz bhul jaen to ganga nahaen hum

gham ki andheri raat hai to 'joji' yun karen

kuchh dip wo jalaen to ganga nahaen hum