gar ye himmat hai ki tufan ki zad par rahiye

gar ye himmat hai ki tūfān kī zad par rahiye

nā-ḳhudāoñ ke kamālāt se bach kar rahiye

ghar hai shīshe kā to is daur meñ jiine ke liye

sañg-rezoñ kī qabā oḌh ke dar par rahiye

duur bahtī huī ākāsh kī gañgā se pare

āsmāñ DhūñD na paa.eñ yuuñ simaT kar rahiye

ye ḳhabar hai ki koī barq giregī mujh par

ye ḳhabar sach hai to phir aaj ke din ghar rahiye

mere dil meñ utar aayā hai koī tūfāñ sā

zabt kahtā hai ki idrāk ke paikar rahiye

qatl-gāhoñ meñ bhī sabqat tabhī dī jā.egī

apnī gardan pe salīb apnī uThā kar rahiye

tum ko hālāt se shikva na sahī phir bhī 'anīs'

apne jazbāt kī yalġhār se Dar kar rahiye

gar ye himmat hai ki tufan ki zad par rahiye

na-KHudaon ke kamalat se bach kar rahiye

ghar hai shishe ka to is daur mein jine ke liye

sang-rezon ki qaba oDh ke dar par rahiye

dur bahti hui aakash ki ganga se pare

aasman DhunD na paen yun simaT kar rahiye

ye KHabar hai ki koi barq giregi mujh par

ye KHabar sach hai to phir aaj ke din ghar rahiye

mere dil mein utar aaya hai koi tufan sa

zabt kahta hai ki idrak ke paikar rahiye

qatl-gahon mein bhi sabqat tabhi di jaegi

apni gardan pe salib apni uTha kar rahiye

tum ko haalat se shikwa na sahi phir bhi 'anis'

apne jazbaat ki yalghaar se Dar kar rahiye