gard-alud hain aur KHun mein nahae hue hain

gard-ālūd haiñ aur ḳhuuñ meñ nahā.e hue haiñ

ye jo taa.ir haiñ ye kis shahr se aa.e hue haiñ

rāteñ aa aa ke uḌāne lagīñ nīñdoñ kā mazāq

tum ne āñkhoñ ko bahut ḳhvāb dikhā.e hue haiñ

kal jinheñ apnī kahānī meñ kiyā thā shāmil

ab vo kirdār mirī jaan ko aa.e hue haiñ

sahmī sahmī sī khaḌī dekh rahī hai duniyā

merī bebākiyāñ kuchh raaz chhupā.e hue haiñ

jo gulāboñ ke ḳharīdār the ab to vo bhī

cactus shaan se gamloñ meñ lagā.e hue haiñ

zid hai girtī huī dīvār bachāne kī hameñ

aur bādal bhī bahut TuuT ke chhā.e hue haiñ

ye hī hotā hai mohabbat meñ yahī hotā hai

aap be-vaj.h hī tūfān uThā.e hue haiñ

ye na aa jaa.eñ kahīñ qaht-e-adab kī zad meñ

ham ne tahzīb ke kuchh peḌ lagā.e hue haiñ

gard-alud hain aur KHun mein nahae hue hain

ye jo tair hain ye kis shahr se aae hue hain

raaten aa aa ke uDane lagin nindon ka mazaq

tum ne aankhon ko bahut KHwab dikhae hue hain

kal jinhen apni kahani mein kiya tha shamil

ab wo kirdar meri jaan ko aae hue hain

sahmi sahmi si khaDi dekh rahi hai duniya

meri bebakiyan kuchh raaz chhupae hue hain

jo gulabon ke KHaridar the ab to wo bhi

cactus shan se gamlon mein lagae hue hain

zid hai girti hui diwar bachane ki hamein

aur baadal bhi bahut TuT ke chhae hue hain

ye hi hota hai mohabbat mein yahi hota hai

aap be-wajh hi tufan uThae hue hain

ye na aa jaen kahin qaht-e-adab ki zad mein

hum ne tahzib ke kuchh peD lagae hue hain