gardish-e-jam nahin gardish-e-ayyam to hai

gardish-e-jām nahīñ gardish-e-ayyām to hai

sa.ī-e-nākām sahī phir bhī koī kaam to hai

dil kī betābī kā āḳhir kahīñ anjām to hai

merī qismat meñ nahīñ dahr meñ ārām to hai

mā.il-e-lutf-o-karam husn-e-dil-ārām to hai

merī ḳhātir na sahī koī sar-e-bām to hai

tū nahīñ merā masīhā mirā qātil hī sahī

mujh se vābasta kisī taur tirā naam to hai

halqa-e-mauj meñ ik aur safīna aayā

sāhil-e-bahr pe kohrām kā hañgām to hai

tañg-dasto tahī-dāmāno karo shukr-e-ḳhudā

mai-e-gulfām nahīñ hai shafaq-e-shām to hai

gardish-e-jam nahin gardish-e-ayyam to hai

sai-e-nakaam sahi phir bhi koi kaam to hai

dil ki betabi ka aaKHir kahin anjam to hai

meri qismat mein nahin dahr mein aaram to hai

mail-e-lutf-o-karam husn-e-dil-aram to hai

meri KHatir na sahi koi sar-e-baam to hai

tu nahin mera masiha mera qatil hi sahi

mujh se wabasta kisi taur tera nam to hai

halqa-e-mauj mein ek aur safina aaya

sahil-e-bahr pe kohram ka hangam to hai

tang-dasto tahi-damano karo shukr-e-KHuda

mai-e-gulfam nahin hai shafaq-e-sham to hai