gardish-e-muqaddar ka silsila jo chal jae

gardish-e-muqaddar kā silsila jo chal jaa.e

dūsrā itaab aa.e ik balā jo Tal jaa.e

hujra-e-garebāñ meñ har javāb raushan hai

bas zarā nigāhoñ kā zāviya badal jaa.e

āñsuoñ ke bahne kā ye asar to hotā hai

ġham zarā sā Dhal jaa.e dil bhī kuchh sambhal jaa.e

mas.aloñ kī gutthī bhī yuuñ kahāñ sulajhtī hai

ik sirā jo haath aa.e dūsrā nikal jaa.e

is adā ko kyā kahiye vo paḌos se aa kar

gul na.e sajā jaa.e chādareñ badal jaa.e

kyā ajab tasavvur hai ham talab ke māroñ kā

hiddat-e-tamannā se āsmāñ pighal jaa.e

gardish-e-muqaddar ka silsila jo chal jae

dusra itab aae ek bala jo Tal jae

hujra-e-gareban mein har jawab raushan hai

bas zara nigahon ka zawiya badal jae

aansuon ke bahne ka ye asar to hota hai

gham zara sa Dhal jae dil bhi kuchh sambhal jae

masalon ki gutthi bhi yun kahan sulajhti hai

ek sira jo hath aae dusra nikal jae

is ada ko kya kahiye wo paDos se aa kar

gul nae saja jae chadaren badal jae

kya ajab tasawwur hai hum talab ke maron ka

hiddat-e-tamanna se aasman pighal jae