gardish-e-waqt se laDna hai jhagaDna hai abhi

gardish-e-vaqt se laḌnā hai jhagaḌnā hai abhī

chaḌhte sūraj haiñ hameñ aur ubharnā hai abhī

hausle dūrī-e-manzil se na thak jaa.eñ kahīñ

kitnī pur-ḳhār sī rāhoñ se guzarnā hai abhī

nok-e-mizhgāñ pe utar aa.e haiñ aañsū aise

abr-e-bārāñ kī tarah jaise barasnā hai abhī

us ko ḳhvāboñ meñ basā rakkhā hai ḳhushbū kī tarah

aur ta.abīr talak us ko Thaharnā hai abhī

Thokareñ ham ko sambhalne kā sabaq detī hai

bārhā tum ko 'sadaf' girnā sambhalnā hai abhī

gardish-e-waqt se laDna hai jhagaDna hai abhi

chaDhte suraj hain hamein aur ubharna hai abhi

hausle duri-e-manzil se na thak jaen kahin

kitni pur-KHar si rahon se guzarna hai abhi

nok-e-mizhgan pe utar aae hain aansu aise

abr-e-baran ki tarah jaise barasna hai abhi

us ko KHwabon mein basa rakkha hai KHushbu ki tarah

aur tabir talak us ko Thaharna hai abhi

Thokaren hum ko sambhalne ka sabaq deti hai

barha tum ko 'sadaf' girna sambhalna hai abhi