gharq na kar dikhla kar dil ko kan ka baala zulf ka halqa

ġharq na kar dikhlā kar dil ko kaan kā baalā zulf kā halqa

bahr-e-husn ke haiñ ye bhañvar do kaan kā baalā zulf kā halqa

hāla-e-mah pahuñche hai na us ko nai ḳhat-e-sāġhar us ko lage hai

ā.īna tum le kar dekho kaan kā baalā zulf kā halqa

āhū-e-dil aur tā.ir-e-jāñ ke haq meñ ye donoñ phande haiñ

ham ko dikhā kar tum na chhupāo kaan kā baalā zulf kā halqa

aaj sivā.e shāne ke yaañ kis kā muñh hai kaun hai aisā

chhoḌe tumhāre chehre par jo kaan kā baalā zulf kā halqa

donoñ tere 'āriz par din raat mile ye rahte haiñ

ainak-e-mahr-o-māh na kyuuñ ho kaan kā baalā zulf kā halqa

taish-zanī meñ ye aqrab hai kaalā hai vo kunDlī maare

hazrat-e-dil baaz aao na chheḌo kaan kā baalā zulf kā halqa

kis ko hisār-e-husn kahūñ maiñ kis ko ḳhat-e-parkār kahe dil

muñh se ulaT burqa' ko dikhā do kaan kā baalā zulf kā halqa

ye tire ruḳh ke bose leñ aur tarseñ mirī āñkheñ ai vaa.e

dekh ke kyuuñ rashk aa.e na mujh ko kaan kā baalā zulf kā halqa

aaj zuleḳhā gar yahāñ hotī dām-e-kamand-o-chāh meñ phañstī

dekh mire yūsuf kā 'azīzo kaan kā baalā zulf kā halqa

kyūñki 'nasīr' arbāb-e-suḳhan tahsīñ na kareñ sun kar ye ġhazal

jabki tum is sūrat se bāñdho kaan kā baalā zulf kā halqa

gharq na kar dikhla kar dil ko kan ka baala zulf ka halqa

bahr-e-husn ke hain ye bhanwar do kan ka baala zulf ka halqa

haala-e-mah pahunche hai na us ko nai KHat-e-saghar us ko lage hai

aaina tum le kar dekho kan ka baala zulf ka halqa

aahu-e-dil aur tair-e-jaan ke haq mein ye donon phande hain

hum ko dikha kar tum na chhupao kan ka baala zulf ka halqa

aaj siwae shane ke yan kis ka munh hai kaun hai aisa

chhoDe tumhaare chehre par jo kan ka baala zulf ka halqa

donon tere 'ariz par din raat mile ye rahte hain

ainak-e-mahr-o-mah na kyun ho kan ka baala zulf ka halqa

taish-zani mein ye aqrab hai kala hai wo kunDli mare

hazrat-e-dil baz aao na chheDo kan ka baala zulf ka halqa

kis ko hisar-e-husn kahun main kis ko KHat-e-parkar kahe dil

munh se ulaT burqa' ko dikha do kan ka baala zulf ka halqa

ye tere ruKH ke bose len aur tarsen meri aankhen ai wae

dekh ke kyun rashk aae na mujh ko kan ka baala zulf ka halqa

aaj zuleKHa gar yahan hoti dam-e-kamand-o-chah mein phansti

dekh mere yusuf ka 'azizo kan ka baala zulf ka halqa

kyunki 'nasir' arbab-e-suKHan tahsin na karen sun kar ye ghazal

jabki tum is surat se bandho kan ka baala zulf ka halqa