gazak ki is qadar ai mast tujhko kya shitabi hai

gazak kī is qadar ai mast tujh ko kyā shitābī hai

hamārā bhī dil sad-laḳht-e-dūkān-e-kabābī hai

nahīñ juz qurs mahr-o-māh kuchh gardūñ ke matbaḳh meñ

so vo bhī ek nān-e-soḳhta aur ek aabī hai

chhuḌā mashshāta zulf-e-yār ko shāne ke nīche se

ki us kī kashmakash se dil ko mere pech-o-tābī hai

badan par kuchh mire zāhir nahīñ aur dil meñ sozish hai

ḳhudā jaane ye kis ne raakh andar aag daabī hai

shikast aatī hai is meñ mauj-e-mai se dekhiyo saaqī

bachānā Thes se shīsha mire dil kā habābī hai

rahe hai kaam ham ko roz-o-shab qur.ān o masjid se

ki abrū us kī hai mehrāb aur chehrā kitābī hai

kisū ke ablaq-e-ayyām chaḌhne kā nahīñ raazī

azal se 'hātim' is tausan meñ aib-e-bad-rikābī hai

gazak ki is qadar ai mast tujh ko kya shitabi hai

hamara bhi dil sad-laKHt-e-dukan-e-kababi hai

nahin juz qurs mahr-o-mah kuchh gardun ke matbaKH mein

so wo bhi ek nan-e-soKHta aur ek aabi hai

chhuDa mashshata zulf-e-yar ko shane ke niche se

ki us ki kashmakash se dil ko mere pech-o-tabi hai

badan par kuchh mere zahir nahin aur dil mein sozish hai

KHuda jaane ye kis ne rakh andar aag dabi hai

shikast aati hai is mein mauj-e-mai se dekhiyo saqi

bachana Thes se shisha mere dil ka hababi hai

rahe hai kaam hum ko roz-o-shab quran o masjid se

ki abru us ki hai mehrab aur chehra kitabi hai

kisu ke ablaq-e-ayyam chaDhne ka nahin raazi

azal se 'hatim' is tausan mein aib-e-bad-rikabi hai