ghazal ko gardish-e-ayyam se nikalte hain

ġhazal ko gardish-e-ayyām se nikālte haiñ

use na hone ke ib.hām se nikālte haiñ

ye log kyuuñ tirī takzīb karte haiñ jabki

hazār kaam tire naam se nikālte haiñ

ye sher haiñ hameñ ḳhairāt meñ nahīñ milte

kabhī dhueñ se kabhī jaam se nikālte haiñ

tujhe ḳhabar hī nahīñ hai ki ham visāl kī faal

kabhī sahar se kabhī shaam se nikālte haiñ

ḳhudāyā dasht-e-safar ḳhatm kyuuñ nahīñ hotā

surāġh-e-rāh to har gaam se nikālte haiñ

ab intizār yahī hai ki kab hamāre imaam

hameñ musībat-o-ālām se nikālte haiñ

kuchh aur kāmoñ meñ dil ko lagā ke dekheñ 'zakī'

ise tilism-e-shafaq-fām se nikālte haiñ

ghazal ko gardish-e-ayyam se nikalte hain

use na hone ke ibham se nikalte hain

ye log kyun teri takzib karte hain jabki

hazar kaam tere nam se nikalte hain

ye sher hain hamein KHairaat mein nahin milte

kabhi dhuen se kabhi jam se nikalte hain

tujhe KHabar hi nahin hai ki hum visal ki fal

kabhi sahar se kabhi sham se nikalte hain

KHudaya dasht-e-safar KHatm kyun nahin hota

suragh-e-rah to har gam se nikalte hain

ab intizar yahi hai ki kab hamare imam

hamein musibat-o-alam se nikalte hain

kuchh aur kaamon mein dil ko laga ke dekhen 'zaki'

ise tilism-e-shafaq-fam se nikalte hain