ghazlon ki kaenat ka badla hua hai Dhang

ġhazloñ kī kā.enāt kā badlā huā hai Dhañg

allāh jaane kis ghaḌī bedār ho malañg

maiñ bhī mirā raqīb bhī donoñ haiñ zaḳhm zaḳhm

donoñ lahūluhān haiñ ye hai anā kā rañg

sar kāTtā na aap kā kartā maiñ kyā bhalā

is baar laḌ rahā thā maiñ apnī baqā kī jañg

muflis ne gar amiir ko chāñTā jaḌā to kyā

ātish-fishāñ bhī paltā hai ġhurbat ke sañg sañg

kab tak bhalā yuuñ jhuuT kī rassī baTe.ge aap

kab tak bhalā yuuñ pesh kareñge bhī uzr-e-lañg

is vāste vo āñkhoñ meñ halqa-ba-gosh haiñ

dil ke qarīb jaatī hai āñkhoñ se ik surañg

sajde meñ vālida ke ye 'hassās' thā asar

dast-e-duā ne jiit lī dast-e-qazā se jañg

ghazlon ki kaenat ka badla hua hai Dhang

allah jaane kis ghaDi bedar ho malang

main bhi mera raqib bhi donon hain zaKHm zaKHm

donon lahuluhan hain ye hai ana ka rang

sar kaTta na aap ka karta main kya bhala

is bar laD raha tha main apni baqa ki jang

muflis ne gar amir ko chanTa jaDa to kya

aatish-fishan bhi palta hai ghurbat ke sang sang

kab tak bhala yun jhuT ki rassi baTege aap

kab tak bhala yun pesh karenge bhi uzr-e-lang

is waste wo aankhon mein halqa-ba-gosh hain

dil ke qarib jati hai aankhon se ek surang

sajde mein walida ke ye 'hassas' tha asar

dast-e-dua ne jit li dast-e-qaza se jang