gesu-e-dauran ko kam kam jitna suljhata hun main

gesu-e-daurāñ ko kam kam jitnā suljhātā huuñ maiñ

kyā qayāmat hai ki utnā hī ulajh jaatā huuñ maiñ

nabz kī raftār ḳhud kah degī ahvāl-e-marīz

ai tabīb-e-vaqt kuchh kahne se ghabrātā huuñ maiñ

faisla-kun baat ho jaatī hai aksar us ghaḌī

zindagī ke rū-ba-rū jab maut ko paatā huuñ maiñ

un ke aane kā tasavvur un ke jaane kā ḳhayāl

har do-ālam ke tasavvur se laraz jaatā huuñ maiñ

sard-mehrī-e-zamāna kā huā hai jab asar

apnī shiryānoñ meñ ḳhūn-e-garm dauḌātā huuñ maiñ

munfa.il hone pe bhī merī ḳhatāoñ kā shumār

kaisā dastūr-e-adālat is jagah paatā huuñ maiñ

haa.e bismil to na samjhā muqtazā-e-vaqt ko

nā-samajh le apnā qissa phir se dohrātā huuñ maiñ

gesu-e-dauran ko kam kam jitna suljhata hun main

kya qayamat hai ki utna hi ulajh jata hun main

nabz ki raftar KHud kah degi ahwal-e-mariz

ai tabib-e-waqt kuchh kahne se ghabraata hun main

faisla-kun baat ho jati hai aksar us ghaDi

zindagi ke ru-ba-ru jab maut ko pata hun main

un ke aane ka tasawwur un ke jaane ka KHayal

har do-alam ke tasawwur se laraz jata hun main

sard-mehri-e-zamana ka hua hai jab asar

apni shiryanon mein KHun-e-garm dauData hun main

munfail hone pe bhi meri KHataon ka shumar

kaisa dastur-e-adalat is jagah pata hun main

hae bismil to na samjha muqtaza-e-waqt ko

na-samajh le apna qissa phir se dohraata hun main