gesu-e-sher-o-adab ke pech suljhata hun main

gesū-e-sher-o-adab ke pech suljhātā huuñ maiñ

zulmat-e-shab meñ payām-e-sub.h-e-nau laatā huuñ maiñ

barbat-e-dil ke mire naġhme nahīñ sho.ale haiñ ye

garmī-e-ehsās se duniyā ko garmātā huuñ maiñ

is jahān-e-āb-o-gil par Dāltā huuñ jab nazar

zindagānī ko sarāsar kashmakash paatā huuñ maiñ

kyuuñ nahīñ insāñ samajhtā uns ko rāh-e-hayāt

sham.a kī mānind is ġham meñ ghulā jaatā huuñ maiñ

sho.ala-e-ulfat madad ai chāra-sāz-e-ġham madad

sard-mehrī se jahāñ kī bujh ke rah jaatā huuñ maiñ

ye kitāb-e-zindagī bhī chīstāñ se kam nahīñ

har varaq meñ dāstāñ-dar-dāstāñ paatā huuñ maiñ

qadr-dānī kī umīdeñ kam-nigāhī ke gile

aadmī ko aadmī se be-ḳhabar paatā huuñ maiñ

dekhnā jūd-o-karam un kā ḳhudā.ī baḳhsh deñ

apnā dāman dekh kar ai 'tāj' sharmātā huuñ maiñ

gesu-e-sher-o-adab ke pech suljhata hun main

zulmat-e-shab mein payam-e-subh-e-nau lata hun main

barbat-e-dil ke mere naghme nahin shoale hain ye

garmi-e-ehsas se duniya ko garmata hun main

is jahan-e-ab-o-gil par Dalta hun jab nazar

zindagani ko sarasar kashmakash pata hun main

kyun nahin insan samajhta uns ko rah-e-hayat

shama ki manind is gham mein ghula jata hun main

shoala-e-ulfat madad ai chaara-saz-e-gham madad

sard-mehri se jahan ki bujh ke rah jata hun main

ye kitab-e-zindagi bhi chistan se kam nahin

har waraq mein dastan-dar-dastan pata hun main

qadr-dani ki umiden kam-nigahi ke gile

aadmi ko aadmi se be-KHabar pata hun main

dekhna jud-o-karam un ka KHudai baKHsh den

apna daman dekh kar ai 'taj' sharmata hun main