ghaDi bhar rang nikhra surat-e-gul-ha-e-tar mera

ghaḌī bhar rañg nikhrā sūrat-e-gul-hā-e-tar merā

usī hastī pe us gulshan meñ thā ye shor-o-shar merā

nizām-e-bazm-e-duniyā hashr ke maidāñ kā naqsha hai

yahī hai shāmat-e-isyāñ bhaTaknā dar-ba-dar merā

samajhtā huuñ vasīla maġhfirat kā sharm-e-isyāñ ko

ki ashkoñ se mire dhul jā.egā dāmān-e-tar merā

fazā-e-ka.aba-e-at.har kā naqsha aañkh se dekhūñ

ilāhī is havā meñ ḳhushk ho dāmān-e-tar merā

dar-e-ka.aba pe jab sajde kiye āvāz ye aa.ī

butoñ kī Thokareñ khā kar tujhe sūjhā hai ghar merā

naqāb-e-husn jab uTThā to āñkheñ khul ga.iiñ merī

faroġh-e-husn thā dam-bhar ko mānind-e-sharar merā

use parde meñ rah kar bhī ḳhayāl aatā hai rah rah kar

ki raaz ifshā na kar de ḳhalq meñ husn-e-bashar merā

guzar kar ḳhāna-e-dil se baḌhūñ kyuuñ tuur kī jānib

ki barq-e-husn se jalne ko hai maujūd ghar merā

sanam qadmoñ pe girte haiñ zabāneñ band rahtī haiñ

butoñ par ro.ab hai allāhu-akbar is qadar merā

mohabbat kī har ik manzil pe sahrā-e-adam niklā

ḳhizar bhī saath de sakte nahīñ har gaam par merā

farishte bhī na samjhe aaj tak merī haqīqat ko

ki tāj-e-ashraf-e-maḳhlūq kī zīnat hai sar merā

zabāñ par zikr jaarī thā barābar hamd-e-ḳhāliq kā

azal meñ kaam Thahrā mid.hat-e-ḳhairul-bashar merā

zabān-e-sham.a maiñ ne kaaT lī hai bad-gumāñ ho kar

ki raaz ifshā na kar de sub.h ko sham-e-sahar merā

mirī hastī se pahle kaun samjhā sirr-e-vahdat ko

rahegā tazkira dair-o-haram meñ umr-bhar merā

vo qatra huuñ ki jis kī mauj meñ bahr-e-haqīqat hai

vo zarra huuñ ki muñh takte haiñ ḳhurshīd-o-qamar merā

dil-e-majrūh kī hālat pe rahm aayā masīhā ko

davā ke naam par hañsne lagā zaḳhm-e-jigar merā

zarā piine to de saaqī sharāb-e-ma.arifat mujh ko

udhar phir jā.egā qibla bhī ruḳh hogā jidhar merā

sadā-e-kalematul-haq meñ tirī tahrīk shāmil hai

anal-haq kahtā hai har qatra-e-ḳhūn-e-jigar merā

yahī sūrat hai ab taqdīr ke chakkar nikalne kī

ilāhī āstāna ho haram kā aur sar merā

tujhe ai charḳh kyā mālūm rutba dard-e-ulfat kā

karegā naam raushan ḳhalq meñ dāġh-e-jigar merā

tamannā hai ki 'rāsiḳh' hamd-goī ke vasīle se

riyāz-e-dahr meñ naḳhl-e-suḳhan ho bār-var merā

ghaDi bhar rang nikhra surat-e-gul-ha-e-tar mera

usi hasti pe us gulshan mein tha ye shor-o-shar mera

nizam-e-bazm-e-duniya hashr ke maidan ka naqsha hai

yahi hai shamat-e-isyan bhaTakna dar-ba-dar mera

samajhta hun wasila maghfirat ka sharm-e-isyan ko

ki ashkon se mere dhul jaega daman-e-tar mera

faza-e-kaba-e-athar ka naqsha aankh se dekhun

ilahi is hawa mein KHushk ho daman-e-tar mera

dar-e-kaba pe jab sajde kiye aawaz ye aai

buton ki Thokaren kha kar tujhe sujha hai ghar mera

naqab-e-husn jab uTTha to aankhen khul gain meri

farogh-e-husn tha dam-bhar ko manind-e-sharar mera

use parde mein rah kar bhi KHayal aata hai rah rah kar

ki raaz ifsha na kar de KHalq mein husn-e-bashar mera

guzar kar KHana-e-dil se baDhun kyun tur ki jaanib

ki barq-e-husn se jalne ko hai maujud ghar mera

sanam qadmon pe girte hain zabanen band rahti hain

buton par roab hai allahu-akbar is qadar mera

mohabbat ki har ek manzil pe sahra-e-adam nikla

KHizar bhi sath de sakte nahin har gam par mera

farishte bhi na samjhe aaj tak meri haqiqat ko

ki taj-e-ashraf-e-maKHluq ki zinat hai sar mera

zaban par zikr jari tha barabar hamd-e-KHaliq ka

azal mein kaam Thahra midhat-e-KHairul-bashar mera

zaban-e-shama main ne kaT li hai bad-guman ho kar

ki raaz ifsha na kar de subh ko sham-e-sahar mera

meri hasti se pahle kaun samjha sirr-e-wahdat ko

rahega tazkira dair-o-haram mein umr-bhar mera

wo qatra hun ki jis ki mauj mein bahr-e-haqiqat hai

wo zarra hun ki munh takte hain KHurshid-o-qamar mera

dil-e-majruh ki haalat pe rahm aaya masiha ko

dawa ke nam par hansne laga zaKHm-e-jigar mera

zara pine to de saqi sharab-e-marifat mujh ko

udhar phir jaega qibla bhi ruKH hoga jidhar mera

sada-e-kalematul-haq mein teri tahrik shamil hai

anal-haq kahta hai har qatra-e-KHun-e-jigar mera

yahi surat hai ab taqdir ke chakkar nikalne ki

ilahi aastana ho haram ka aur sar mera

tujhe ai charKH kya malum rutba dard-e-ulfat ka

karega nam raushan KHalq mein dagh-e-jigar mera

tamanna hai ki 'rasiKH' hamd-goi ke wasile se

riyaz-e-dahr mein naKHl-e-suKHan ho bar-war mera