ghar ki jaanib wo chal raha hoga

ghar kī jānib vo chal rahā hogā

shaam ke saath Dhal rahā hogā

aa.ine toḌ bhī diye hoñge

jab vo chehra badal rahā hogā

ik zamāna thā jis kī muTThī meñ

vaqt use bhī nigal rahā hogā

koī dil dekh sham'-e-be-mehrī

barf jaisā pighal rahā hogā

muddatoñ baa'd mere andar se

koī bāhar nikal rahā hogā

tere lab par hañsī rahī hogī

mere māthe pe bal rahā hogā

ik vahī ḳhvāb jo nahīñ dekhā

merī āñkhoñ meñ pal rahā hogā

ghar ki jaanib wo chal raha hoga

sham ke sath Dhal raha hoga

aaine toD bhi diye honge

jab wo chehra badal raha hoga

ek zamana tha jis ki muTThi mein

waqt use bhi nigal raha hoga

koi dil dekh sham'-e-be-mehri

barf jaisa pighal raha hoga

muddaton ba'd mere andar se

koi bahar nikal raha hoga

tere lab par hansi rahi hogi

mere mathe pe bal raha hoga

ek wahi KHwab jo nahin dekha

meri aankhon mein pal raha hoga