ghar se burqa jo ulaT wo mah-e-taban nikla

ghar se burqa jo ulaT vo mah-e-tābāñ niklā

chauñk uThī ḳhalq ki iiñ mehr-e-daraḳhshāñ niklā

mah ko aur tujh ko jo mīzān-e-ḳhirad meñ tolā

is se to husn meñ ai yaar do chandāñ niklā

rah ga.e hosh-o-havās-o-ḳhirad-o-tāqat sab

yuuñ tire kūche se maiñ be-sar-o-sāmāñ niklā

yaañ talak tīr-e-mizha khaa.e haiñ maiñ ne us ke

jā-e-sabza mire marqad pe niyastāñ niklā

tere bīmār kī sunte haiñ ye hālat hai ki ab

jo gayā us kī ḳhabar ko so vo giryāñ niklā

vaah kyā toḌ tirī tīr-e-nigah kā hai ki yaar

jis ke siine meñ lagā pusht se paikāñ niklā

sozish-e-dil ko bhī mere na bujhāyā tum ne

kaam itnā bhī na ai dīda-e-giryāñ niklā

fat.h diijo tū use yā shah-e-mardāñ ki tirā

mulk-gīrī ko jo hai ab ye 'sulaimāñ' niklā

ghar se burqa jo ulaT wo mah-e-taban nikla

chaunk uThi KHalq ki in mehr-e-daraKHshan nikla

mah ko aur tujh ko jo mizan-e-KHirad mein tola

is se to husn mein ai yar do chandan nikla

rah gae hosh-o-hawas-o-KHirad-o-taqat sab

yun tere kuche se main be-sar-o-saman nikla

yan talak tir-e-mizha khae hain main ne us ke

ja-e-sabza mere marqad pe niyastan nikla

tere bimar ki sunte hain ye haalat hai ki ab

jo gaya us ki KHabar ko so wo giryan nikla

wah kya toD teri tir-e-nigah ka hai ki yar

jis ke sine mein laga pusht se paikan nikla

sozish-e-dil ko bhi mere na bujhaya tum ne

kaam itna bhi na ai dida-e-giryan nikla

fath dijo tu use ya shah-e-mardan ki tera

mulk-giri ko jo hai ab ye 'sulaiman' nikla