ghar se tanha jo hum chale aae

ghar se tanhā jo ham chale aa.e

tab samajh meñ ye rāste aa.e

kaun mahfil meñ dekhtā ham ko

jo bhī aa.e tire liye aa.e

kyā kahā ḳhaak meñ milā deñge

jā.iye jā.iye baḌe aa.e

ghar ke in mas.aloñ ko sharm nahīñ

kaam par saath hī chale aa.e

jo chhupe rahte to hī achchhā thā

kyoñ manāzir ye sāmne aa.e

dil-e-barbād kī qasam yaaro

vāqa'ī 'ishq meñ maze aa.e

aane vāloñ ke bhes meñ 'kāmil'

jaane vaale yahāñ chale aa.e

ghar se tanha jo hum chale aae

tab samajh mein ye raste aae

kaun mahfil mein dekhta hum ko

jo bhi aae tere liye aae

kya kaha KHak mein mila denge

jaiye jaiye baDe aae

ghar ke in masalon ko sharm nahin

kaam par sath hi chale aae

jo chhupe rahte to hi achchha tha

kyon manazir ye samne aae

dil-e-barbaad ki qasam yaro

waqa'i 'ishq mein maze aae

aane walon ke bhes mein 'kaamil'

jaane wale yahan chale aae