ghaTa diya rutba har hasin ka miTa diya rang hur-e-in ka

ghaTā diyā rutba har hasīñ kā miTā diyā rañg hūr-e-īñ kā

nahīñ hai ye chāñd chaudhvīñ kā shabāb kā mere mah-jabīñ kā

ye raat hai vasl kī mirī jaañ bhare haiñ dil meñ hazāroñ armāñ

nahīñ na nikle zabāñ se haañ haañ are ye mauqa.a nahīñ nahīñ kā

tabāh vahshat meñ huuñ maiñ dar dar abhī bigaḌ jaa.e ye banā ghar

jo dil meñ rakkhūñ tujhe sitamgar to dil na rakkhe mujhe kahīñ kā

na qatl se mere haath khīñcho lahū bahā kar bahār dekho

paḌegī uḌ kar jo chhīñT is kī banegī vo phuul āstīñ kā

sitam thā bachpan kā vo zamāna ġhazab vo dil kā pasand aatā

vo god meñ merī loT jaanā machal machal kar kisī hasīñ kā

tumhīñ se rū-e-zamīñ mo.attar tumhīñ se sat.h-e-falak munavvar

tumhīñ to ho phuul yāsmīñ kā tumhīñ to ho chāñd chaudhvīñ kā

udhar sabā ne ye gul khilāyā chaman meñ kaliyoñ ko gudgudāyā

idhar hañsī ne sitam ye Dhāyā ki muñh liyā chuum us hasīñ kā

ye raat itnī jo baḌh ga.ī hai siyāhī itnī jo chaḌh ga.ī hai

kahīñ khulā hai zarūr joḌā kisī ke gesū-e-ambarīñ kā

jo ġhair se yaar tū milā hai to dekh kaisā Dubo rahā hai

tujhe mire āñsuoñ kā dariyā mujhe pasīna tirī jabīñ kā

na bahr jaarī sahāb se hai na chaah labrez aab se hai

vo dāman-e-tar kā ik laqab hai ye naam hai merī āstīñ kā

jo dekh le us kī sūrat insān agar ho kāfir to laa.e īmāñ

jamāl kyā hai but-e-hasīñ kā kamāl hai sūrat-āfrīñ kā

na shauq-e-nazzāra mujh se pūchho ye kah ke sotā huuñ roz shab ko

uThūñ jo maiñ sub.h ko ilāhī to muñh dikhānā kisī hasīñ kā

kuchh aisī kī maiñ ne jab.ha-sā.ī ki miT ga.ī baḳht kī burā.ī

milā jo us dar se dāġh-e-sajda sitāra chamkā mirī jabīñ kā

zabāñ se ho shukr adā kahāñ tak baḌā hī thā dil-navāz nāvak

kuchh is adā se jigar pe baiThā maza milā yār-e-ham-nashīñ kā

phirā adam se na koī hamdam ki haal yāroñ kā pūchhte ham

ajiib dilchasp hai do-ālam ki jo gayā ho gayā vahīñ kā

araq araq hai jo rū-e-gul-gūñ ye ḳhuub mauqa.a hai ab na chaukūñ

maiñ sarnavisht apnī dho hī Dālūñ pasīna le kar tirī jabīñ kā

'jalīl' kyā baat is suḳhan kī ġhazal meñ hai tāzgī chaman kī

jo sher hai shāḳh nastaran kī jo lafz hai phuul yāsmīñ kā

ghaTa diya rutba har hasin ka miTa diya rang hur-e-in ka

nahin hai ye chand chaudhwin ka shabab ka mere mah-jabin ka

ye raat hai wasl ki meri jaan bhare hain dil mein hazaron arman

nahin na nikle zaban se han han are ye mauqa nahin nahin ka

tabah wahshat mein hun main dar dar abhi bigaD jae ye bana ghar

jo dil mein rakkhun tujhe sitamgar to dil na rakkhe mujhe kahin ka

na qatl se mere hath khincho lahu baha kar bahaar dekho

paDegi uD kar jo chhinT is ki banegi wo phul aastin ka

sitam tha bachpan ka wo zamana ghazab wo dil ka pasand aata

wo god mein meri loT jaana machal machal kar kisi hasin ka

tumhin se ru-e-zamin moattar tumhin se sath-e-falak munawwar

tumhin to ho phul yasmin ka tumhin to ho chand chaudhwin ka

udhar saba ne ye gul khilaya chaman mein kaliyon ko gudgudaya

idhar hansi ne sitam ye Dhaya ki munh liya chum us hasin ka

ye raat itni jo baDh gai hai siyahi itni jo chaDh gai hai

kahin khula hai zarur joDa kisi ke gesu-e-ambarin ka

jo ghair se yar tu mila hai to dekh kaisa Dubo raha hai

tujhe mere aansuon ka dariya mujhe pasina teri jabin ka

na bahr jari sahab se hai na chah labrez aab se hai

wo daman-e-tar ka ek laqab hai ye nam hai meri aastin ka

jo dekh le us ki surat insan agar ho kafir to lae iman

jamal kya hai but-e-hasin ka kamal hai surat-afrin ka

na shauq-e-nazzara mujh se puchho ye kah ke sota hun roz shab ko

uThun jo main subh ko ilahi to munh dikhana kisi hasin ka

kuchh aisi ki main ne jabha-sai ki miT gai baKHt ki burai

mila jo us dar se dagh-e-sajda sitara chamka meri jabin ka

zaban se ho shukr ada kahan tak baDa hi tha dil-nawaz nawak

kuchh is ada se jigar pe baiTha maza mila yar-e-ham-nashin ka

phira adam se na koi hamdam ki haal yaron ka puchhte hum

ajib dilchasp hai do-alam ki jo gaya ho gaya wahin ka

araq araq hai jo ru-e-gul-gun ye KHub mauqa hai ab na chaukun

main sarnawisht apni dho hi Dalun pasina le kar teri jabin ka

'jalil' kya baat is suKHan ki ghazal mein hai tazgi chaman ki

jo sher hai shaKH nastaran ki jo lafz hai phul yasmin ka