ghaTa ho baad-e-bahaari ho aur jam nahin

ghaTā ho bād-e-bahārī ho aur jaam nahīñ

ġhazab ho saaqī agar mai se koī kaam nahīñ

hamārī baat bhī zāhid se jā ke kah denā

use halāl nahīñ mai hameñ harām nahīñ

kisī ko fikr ho kyoñ mere marne jiine kī

ki merī zaat se barham koī nizām nahīñ

haqīqatan yahī duniyā sarā-e-fānī hai

hai kuuch sabab ki kisī ko yahāñ qiyām nahīñ

bahut savāb mile TuuTe dil ko gar joḌe

kuchh is se baḌh ke zamāne meñ koī kaam nahīñ

chale the diid ko ye kah ke us ko rok diyā

ye ḳhaas logoñ kī baarī hai dīd-e-ām nahīñ

bharosa kījiye hargiz na us kī bātoñ kā

jise na apnī kisī baat par qiyām nahīñ

hamesha ġhībateñ kartā burā-bhalā kahtā

in hāsidoñ ko sivā is ke aur kaam nahīñ

kahīñ jo hatthe chaḌhā dil-jaloñ ke charḳh-e-kuhan

jalā ke ḳhaak na kar deñ to merā naam nahīñ

maiñ vo ġhayūr huuñ 'dīvān' aaj tak jis ne

kisī amiir ko jhuk kar kiyā salām nahīñ

khulī haqīqat-e-'dīvān' ahl-e-naḳhvat par

ra.īs-zāda huuñ maiñ bhī koī ġhulām nahīñ

ghaTa ho baad-e-bahaari ho aur jam nahin

ghazab ho saqi agar mai se koi kaam nahin

hamari baat bhi zahid se ja ke kah dena

use halal nahin mai hamein haram nahin

kisi ko fikr ho kyon mere marne jine ki

ki meri zat se barham koi nizam nahin

haqiqatan yahi duniya sara-e-fani hai

hai kuch sabab ki kisi ko yahan qiyam nahin

bahut sawab mile TuTe dil ko gar joDe

kuchh is se baDh ke zamane mein koi kaam nahin

chale the did ko ye kah ke us ko rok diya

ye KHas logon ki bari hai did-e-am nahin

bharosa kijiye hargiz na us ki baaton ka

jise na apni kisi baat par qiyam nahin

hamesha ghibaten karta bura-bhala kahta

in hasidon ko siwa is ke aur kaam nahin

kahin jo hatthe chaDha dil-jalon ke charKH-e-kuhan

jala ke KHak na kar den to mera nam nahin

main wo ghayur hun 'diwan' aaj tak jis ne

kisi amir ko jhuk kar kiya salam nahin

khuli haqiqat-e-'diwan' ahl-e-naKHwat par

rais-zada hun main bhi koi ghulam nahin