ghaTaon ki udasi pi raha hun

ghaTāoñ kī udāsī pī rahā huuñ

maiñ ik gahrā samundar ban gayā huuñ

tirī yādoñ ke añgāroñ ko aksar

tasavvur ke laboñ se chūmtā huuñ

koī pahchānñe vaalā nahīñ hai

bhare bāzār meñ tanhā khaḌā huuñ

mirā qad kitnā ūñchā ho gayā hai

falak kī vus.atoñ ko nāptā huuñ

vo yuuñ mujh ko bhulānā chāhte haiñ

ki jaise maiñ bhī koī hādisa huuñ

badalte mausamoñ kī Diary se

tire baare meñ aksar pūchhtā huuñ

mire kamre meñ yādeñ so rahī haiñ

maiñ saḌkoñ par bhaTaktā phir rahā huuñ

ubharte Dūbte sūraj kā manzar

basoñ kī khiḌkiyoñ se dekhtā huuñ

kisī kī yaad ke pattoñ ko 'āzar'

havāoñ se bachā kar rakh rahā huuñ

ghaTaon ki udasi pi raha hun

main ek gahra samundar ban gaya hun

teri yaadon ke angaron ko aksar

tasawwur ke labon se chumta hun

koi pahchanne wala nahin hai

bhare bazar mein tanha khaDa hun

mera qad kitna uncha ho gaya hai

falak ki wusaton ko napta hun

wo yun mujh ko bhulana chahte hain

ki jaise main bhi koi hadisa hun

badalte mausamon ki Diary se

tere bare mein aksar puchhta hun

mere kamre mein yaaden so rahi hain

main saDkon par bhaTakta phir raha hun

ubharte Dubte suraj ka manzar

bason ki khiDkiyon se dekhta hun

kisi ki yaad ke patton ko 'azar'

hawaon se bacha kar rakh raha hun