ghirte baadal mein tanhai kaisi lagti hai

ghirte bādal meñ tanhā.ī kaisī lagtī hai

milan kā mausam aur judā.ī kaisī lagtī hai

suune man ke tāroñ se jab bāteñ hotī hoñ

duuje āñgan kī shahnā.ī kaisī lagtī hai

dil kī choT ubhar aa.e aur zaḳhm hare ho jaa.eñ

yādoñ kī chaltī purvā.ī kaisī lagtī hai

tum ko shahr-e-ḳhayāl meñ rahnā kaisā lagtā hai

vo bastī jo dil ne basā.ī kaisī lagtī hai

chaḌhte ruup kī sūraj devtā aur bhī maan baḌhā.eñ

dhundlī āñkhoñ kī bīnā.ī kaisī lagtī hai

jag biite jab jagmag ye dil us kī jot se thā

ab jo vo sūrat phir yaad aa.ī kaisī lagtī hai

dil to apnā bhar bhar aa.e niyyat nahīñ bhare

umr kā hāsil aisī kamā.ī kaisī lagtī hai

bachpan aur javānī būḌhī umr ke dar pe haiñ

tīnoñ zamānoñ kī yakjā.ī kaisī lagtī hai

'bāqar' saarī umr guzārī kū-e-malāmat meñ

āḳhir umr kī ye rusvā.ī kaisī lagtī hai

ghirte baadal mein tanhai kaisi lagti hai

milan ka mausam aur judai kaisi lagti hai

sune man ke taron se jab baaten hoti hon

duje aangan ki shahnai kaisi lagti hai

dil ki choT ubhar aae aur zaKHm hare ho jaen

yaadon ki chalti purwai kaisi lagti hai

tum ko shahr-e-KHayal mein rahna kaisa lagta hai

wo basti jo dil ne basai kaisi lagti hai

chaDhte rup ki suraj dewta aur bhi man baDhaen

dhundli aankhon ki binai kaisi lagti hai

jag bite jab jagmag ye dil us ki jot se tha

ab jo wo surat phir yaad aai kaisi lagti hai

dil to apna bhar bhar aae niyyat nahin bhare

umr ka hasil aisi kamai kaisi lagti hai

bachpan aur jawani buDhi umr ke dar pe hain

tinon zamanon ki yakjai kaisi lagti hai

'baqar' sari umr guzari ku-e-malamat mein

aaKHir umr ki ye ruswai kaisi lagti hai