ghul jae jis mein rang wo pani nahin hun main

ghul jaa.e jis meñ rang vo paanī nahīñ huuñ maiñ

apnī anā kā dushman-e-jānī nahīñ huuñ maiñ

dīvāreñ rok paa.eñ vo paanī nahīñ huuñ maiñ

phir jaa.e jis kā ruḳh vo ravānī nahīñ huuñ maiñ

Dhālī ga.ī niyat mirī sīrat kī aañch se

sūrat pe mar-miTe vo javānī nahīñ huuñ maiñ

hālāt-e-hāzira kī tapish kī dalīl huuñ

maazī kī bhūlī-bisrī kahānī nahīñ huuñ maiñ

zinda rahūñgā un ke ta.āruf kī shakl meñ

sirf apne buzurgoñ kī nishānī nahīñ huuñ maiñ

takmīl-e-ḳhvāhishāt kā āsār huuñ miyāñ

parkho mujhe nishān-e-girānī nahīñ huuñ maiñ

zinda rakhegā mujh ko 'sa.ādat' mirā kalām

kah dījiyegā maut se faanī nahīñ huuñ maiñ

ghul jae jis mein rang wo pani nahin hun main

apni ana ka dushman-e-jaani nahin hun main

diwaren rok paen wo pani nahin hun main

phir jae jis ka ruKH wo rawani nahin hun main

Dhaali gai niyat meri sirat ki aanch se

surat pe mar-miTe wo jawani nahin hun main

haalat-e-hazira ki tapish ki dalil hun

mazi ki bhuli-bisri kahani nahin hun main

zinda rahunga un ke taaruf ki shakl mein

sirf apne buzurgon ki nishani nahin hun main

takmil-e-KHwahishat ka aasar hun miyan

parkho mujhe nishan-e-girani nahin hun main

zinda rakhega mujh ko 'saadat' mera kalam

kah dijiyega maut se fani nahin hun main