ghungru pe baat kar na tu pail pe baat kar

ghuñgrū pe baat kar na tū paa.il pe baat kar

mujh se tavā.ifoñ ke masā.il pe baat kar

fōtpath par paḌā huā dīvān-e-mīr dekh

raddī meñ bikne vaale rasā.il pe baat kar

is meñ bhī ajr hai nihāñ naflī namāz kā

masjid meñ bhiik māñgte saa.il pe baat kar

merā duā se baḌh ke davā par yaqīn hai

mujh se vasīla chhoḌ vasā.il pe baat kar

aa mere saath baiTh mire saath chaa.e pī

aa mere saath mere dalā.il pe baat kar

sardār haiñ jo aaj vo ġhaddār the kabhī

jā un se un ke daur-e-avā.il pe baat kar

'vāsif' bhī sālikoñ ke qabīle kā fard hai

'vāsif' se ārifoñ ke shamā.il pe baat kar

ghungru pe baat kar na tu pail pe baat kar

mujh se tawaifon ke masail pe baat kar

footpath par paDa hua diwan-e-mir dekh

raddi mein bikne wale rasail pe baat kar

is mein bhi ajr hai nihan nafli namaz ka

masjid mein bhik mangte sail pe baat kar

mera dua se baDh ke dawa par yaqin hai

mujh se wasila chhoD wasail pe baat kar

aa mere sath baiTh mere sath chae pi

aa mere sath mere dalail pe baat kar

sardar hain jo aaj wo ghaddar the kabhi

ja un se un ke daur-e-awail pe baat kar

'wasif' bhi salikon ke qabile ka fard hai

'wasif' se aarifon ke shamail pe baat kar