ghuTi ghuTi hi sahi meri chah le lena

ghuTī ghuTī hī sahī merī chaah le lenā

safar tavīl hai kuchh zād-e-rāh le lenā

maiñ be-samar hī sahī phir bhī sāya-dār to huuñ

kaḌī ho dhuup to mujh meñ panāh le lenā

abhī to saath chalo haañ jahāñ maiñ ruk jā.ūñ

tum us maqām se phir apnī raah le lenā

kisī maqām pe mumkin hai kaam aa jaa.e

hamāre biich jo thī rasm-o-rāh le lenā

vo kam-savād sahī phir bhī ye nahīñ āsāñ

ġhanīm-e-dahr ke sar se kulāh le lenā

yahī bahut hai ki is daur-e-ibtilā meñ 'taqī'

kisī kā merī ḳhabar gaah gaah le lenā

ghuTi ghuTi hi sahi meri chah le lena

safar tawil hai kuchh zad-e-rah le lena

main be-samar hi sahi phir bhi saya-dar to hun

kaDi ho dhup to mujh mein panah le lena

abhi to sath chalo han jahan main ruk jaun

tum us maqam se phir apni rah le lena

kisi maqam pe mumkin hai kaam aa jae

hamare bich jo thi rasm-o-rah le lena

wo kam-sawad sahi phir bhi ye nahin aasan

ghanim-e-dahr ke sar se kulah le lena

yahi bahut hai ki is daur-e-ibtila mein 'taqi'

kisi ka meri KHabar gah gah le lena