gili miTTi hath mein le kar baiTha hun

giilī miTTī haath meñ le kar baiThā huuñ

zehn meñ ik dhuñdle paikar se uljhā huuñ

piis rahā hai dil ko ik vaznī patthar

duub ko bāñhoñ meñ bhar kar maiñ hañstā huuñ

tere hāthoñ ne mujh meñ sab rañg bhare

lekin har pal ye ehsās adhūrā huuñ

dhuup kabhī chamkegī is ummīd pe maiñ

barf ke dariyā meñ sadiyoñ se leTā huuñ

is jānib kab uude bādal ne dekhā

phir bhī maiñ tanhā sarsabz jazīra huuñ

merā karb mirī tanhā.ī kī zīnat

maiñ chehroñ ke jañgal kā sannāTā huuñ

ik dhundlī tasvīr abhī ā.ankhoñ meñ hai

is vaadī se duur bhalā kab rahtā huuñ

raat ufuq par kuchh saaye lahrā.e the

'amabar' ab tak aas lagā.e baiThā huuñ

gili miTTi hath mein le kar baiTha hun

zehn mein ek dhundle paikar se uljha hun

pis raha hai dil ko ek wazni patthar

dub ko banhon mein bhar kar main hansta hun

tere hathon ne mujh mein sab rang bhare

lekin har pal ye ehsas adhura hun

dhup kabhi chamkegi is ummid pe main

barf ke dariya mein sadiyon se leTa hun

is jaanib kab ude baadal ne dekha

phir bhi main tanha sarsabz jazira hun

mera karb meri tanhai ki zinat

main chehron ke jangal ka sannaTa hun

ek dhundli taswir abhi aaankhon mein hai

is wadi se dur bhala kab rahta hun

raat ufuq par kuchh saye lahrae the

'amabar' ab tak aas lagae baiTha hun