gila to aap se hai aur be-sabab bhi nahin

gila to aap se hai aur be-sabab bhī nahīñ

magar irāda-e-iz.hār zer-e-lab bhī nahīñ

maiñ chāhtā huuñ ki apnī zabāñ se kuchh na kahūñ

maiñ sāf-go huuñ magar itnā be-adab bhī nahīñ

jafā kī tarah mujhe tark-e-dostī bhī qubūl

malāl jab bhī na thā mujh ko aur ab bhī nahīñ

guzar gayā vo talabgāriyoñ kā daur ba-ḳhair

ḳhudā kā shukr hai kab fursat-talab bhī nahīñ

mizāj-e-vaqt se tañg aa chukā hai merā zamīr

mire usuul badal jaa.eñ to ajab bhī nahīñ

ga.e dinoñ kā fasāna hai ab hamārā vajūd

vo muflisī bhī nahīñ hai vo roz-o-shab bhī nahīñ

javāb dūñgā maiñ kuchh mujh se pūchh kar dekho

abhī maiñ hosh meñ huuñ aisā jāñ-ba-lab bhī nahīñ

hasab-nasab kī jo pūchho to shajara pesh karūñ

ḳhitāb koī nahīñ hai mirā laqab bhī nahīñ

gila to aap se hai aur be-sabab bhi nahin

magar irada-e-izhaar zer-e-lab bhi nahin

main chahta hun ki apni zaban se kuchh na kahun

main saf-go hun magar itna be-adab bhi nahin

jafa ki tarah mujhe tark-e-dosti bhi qubul

malal jab bhi na tha mujh ko aur ab bhi nahin

guzar gaya wo talabgariyon ka daur ba-KHair

KHuda ka shukr hai kab fursat-talab bhi nahin

mizaj-e-waqt se tang aa chuka hai mera zamir

mere usul badal jaen to ajab bhi nahin

gae dinon ka fasana hai ab hamara wajud

wo muflisi bhi nahin hai wo roz-o-shab bhi nahin

jawab dunga main kuchh mujh se puchh kar dekho

abhi main hosh mein hun aisa jaan-ba-lab bhi nahin

hasab-nasab ki jo puchho to shajara pesh karun

KHitab koi nahin hai mera laqab bhi nahin