gira ke bughz-o-hasad dushmani ka darwaza

girā ke buġhz-o-hasad dushmanī kā darvāza

tū apne dil meñ lagā dostī kā darvāza

husain ibn-e-alī mujh ko yaad aate haiñ

maiñ jab bhī dekhtā huuñ tishnagī kā darvāza

ye soch kar maiñ musībat pe shukr kartā huuñ

milegā ek na ik din ḳhushī kā darvāza

jidhar bhī dekhūñ udhar hī hai maġhribī tahzīb

na jaane gum hai kahāñ sādgī kā darvāza

ḳhudā-e-pāk unheñ sarfarāz kartā hai

talāsh karte haiñ jo ājizī kā darvāza

qadam qadam pe musībat uThā ke khultā hai

baḌā hī saḳht hai ye zindagī kā darvāza

ḳhudā ke fazl se maiñ kohna-mashq shā.ir huuñ

na maiñ ne dekhā kabhī ḳhāmushī kā darvāza

qasam ḳhudā kī mujhe tum dikhā.ī dete ho

maiñ jab bhī kholtā huuñ shā.erī kā darvāza

añdhere hote haiñ us kī hī zindagānī meñ

jo DhūñD saktā nahīñ raushnī kā darvāza

kisī ke ishq meñ barbād ho gayā 'afzal'

magar na toḌ sakā āshiqī kā darvāza

gira ke bughz-o-hasad dushmani ka darwaza

tu apne dil mein laga dosti ka darwaza

husain ibn-e-ali mujh ko yaad aate hain

main jab bhi dekhta hun tishnagi ka darwaza

ye soch kar main musibat pe shukr karta hun

milega ek na ek din KHushi ka darwaza

jidhar bhi dekhun udhar hi hai maghribi tahzib

na jaane gum hai kahan sadgi ka darwaza

KHuda-e-pak unhen sarfaraaz karta hai

talash karte hain jo aajizi ka darwaza

qadam qadam pe musibat uTha ke khulta hai

baDa hi saKHt hai ye zindagi ka darwaza

KHuda ke fazl se main kohna-mashq shair hun

na main ne dekha kabhi KHamushi ka darwaza

qasam KHuda ki mujhe tum dikhai dete ho

main jab bhi kholta hun shaeri ka darwaza

andhere hote hain us ki hi zindagani mein

jo DhunD sakta nahin raushni ka darwaza

kisi ke ishq mein barbaad ho gaya 'afzal'

magar na toD saka aashiqi ka darwaza