giraft-e-karb se aazad ai dil ho hi jaunga

giraft-e-karb se āzād ai dil ho hī jā.ūñgā

abhī rasta huuñ maiñ ik roz manzil ho hī jā.ūñgā

utar jaane de vahshat mere sar se habs-e-ḳhalvat kī

maiñ bit-tadrīj phir mānūs-e-mahfil ho hī jā.ūñgā

gire gar mujh pe barq-e-iltifāt-e-chashm-e-tar har dam

to maiñ bil-jabr terī samt maa.il ho hī jā.ūñgā

ba-sad tarkīb rakkhe haiñ qadam tartīb se maiñ ne

agar tartīb ye bigḌī maiñ zaa.il ho hī jā.ūñgā

matā-e-jāñ to merī zaat kā hissa hai ik din maiñ

tū mil jā.egā to insān-e-kāmil ho hī jā.ūñgā

mirī mazlūmiyat kī raushnī har-sū bikharne de

sar-e-maqtal maiñ pesh-e-teġh-e-qātil ho hī jā.ūñgā

zarā sā Thahar jaa.eñ be-ḳhudī kī muztarib maujeñ

ai dasht-e-ġham maiñ ik ḳhāmosh sāhil ho hī jā.ūñgā

payambar dard kā ban ke tū gar duniyā meñ aa.egā

sahīfa ban ke ashkoñ kā maiñ nāzil ho hī jā.ūñgā

kahā us ne qarīb aa kar 'nadīm' ash.ār kī sūrat

rag-e-afkār meñ terī maiñ shāmil ho hī jā.ūñgā

giraft-e-karb se aazad ai dil ho hi jaunga

abhi rasta hun main ek roz manzil ho hi jaunga

utar jaane de wahshat mere sar se habs-e-KHalwat ki

main bit-tadrij phir manus-e-mahfil ho hi jaunga

gire gar mujh pe barq-e-iltifat-e-chashm-e-tar har dam

to main bil-jabr teri samt mail ho hi jaunga

ba-sad tarkib rakkhe hain qadam tartib se main ne

agar tartib ye bigDi main zail ho hi jaunga

mata-e-jaan to meri zat ka hissa hai ek din main

tu mil jaega to insan-e-kaamil ho hi jaunga

meri mazlumiyat ki raushni har-su bikharne de

sar-e-maqtal main pesh-e-tegh-e-qatil ho hi jaunga

zara sa Thahar jaen be-KHudi ki muztarib maujen

ai dasht-e-gham main ek KHamosh sahil ho hi jaunga

payambar dard ka ban ke tu gar duniya mein aaega

sahifa ban ke ashkon ka main nazil ho hi jaunga

kaha us ne qarib aa kar 'nadim' ashaar ki surat

rag-e-afkar mein teri main shamil ho hi jaunga