girah jo paD gai ranjish mein wo mushkil se niklegi

girah jo paḌ ga.ī ranjish meñ vo mushkil se niklegī

na un ke dil se niklegī na mere dil se niklegī

nahīñ dushvār kuchh apne makāñ se lā-makāñ jaanā

vahīñ pahuñchā.egī jo raah jis manzil se niklegī

mirī kashtī agar chūTegī dariyā-e-mohabbat meñ

to sabse pahle bismillah lab-e-sāhil se niklegī

baḌī saḳhtī se merī jaan niklī hai ka.ī din meñ

yakāyak laash kyūñkar kūcha-e-qātil se niklegī

tarashte haiñ qayāmat ke ġhazab ke raat din fiqre

na.ī jab baat niklegī tirī mahfil se niklegī

rumūz-e-āshiqī ko āshiqo tum 'dāġh' se pūchho

ki bārīkī meñ bārīkī usī kāmil se niklegī

girah jo paD gai ranjish mein wo mushkil se niklegi

na un ke dil se niklegi na mere dil se niklegi

nahin dushwar kuchh apne makan se la-makan jaana

wahin pahunchaegi jo rah jis manzil se niklegi

meri kashti agar chuTegi dariya-e-mohabbat mein

to sabse pahle bismillah lab-e-sahil se niklegi

baDi saKHti se meri jaan nikli hai kai din mein

yakayak lash kyunkar kucha-e-qatil se niklegi

tarashte hain qayamat ke ghazab ke raat din fiqre

nai jab baat niklegi teri mahfil se niklegi

rumuz-e-ashiqi ko aashiqo tum 'dagh' se puchho

ki bariki mein bariki usi kaamil se niklegi