go is se iztirab mein hai jaan-e-zindagi

go is se iztirāb meñ hai jān-e-zindagī

phir bhī ye dard-e-ishq hai shāyān-e-zindagī

achchhā huā ki maut ne mujh ko miTā diyā

maiñ dāġh-e-nang thā sar-e-dāmān-e-zindagī

naġhme samajh rahā hai inheñ nā-suḳhan-shanās

majmūa marsiyoñ kā hai dīvān-e-zindagī

āhū-e-tishna aur fareb-e-sarāb-e-dasht

insān aur aish-e-gurezān-e-zindagī

paayā kahīñ na gauhar-e-maqsūd kā nishāñ

chhānī bahut hai ḳhāk-e-bayābān-e-zindagī

taskīn-e-dil ba-juz ġham-e-ulfat kahīñ nahīñ

sābit huā ki dard hai darmān-e-zindagī

'mahrūm' kis ke nok-e-qalam kā hai shāhkār

afsāna-e-firāq ba-unvān-e-zindagī

go is se iztirab mein hai jaan-e-zindagi

phir bhi ye dard-e-ishq hai shayan-e-zindagi

achchha hua ki maut ne mujh ko miTa diya

main dagh-e-nang tha sar-e-daman-e-zindagi

naghme samajh raha hai inhen na-suKHan-shanas

majmua marsiyon ka hai diwan-e-zindagi

aahu-e-tishna aur fareb-e-sarab-e-dasht

insan aur aish-e-gurezan-e-zindagi

paya kahin na gauhar-e-maqsud ka nishan

chhani bahut hai KHak-e-bayaban-e-zindagi

taskin-e-dil ba-juz gham-e-ulfat kahin nahin

sabit hua ki dard hai darman-e-zindagi

'mahrum' kis ke nok-e-qalam ka hai shahkar

afsana-e-firaq ba-unwan-e-zindagi