god mein panchhi to shaKHon pe samar rakhte hain

god meñ panchhī to shāḳhoñ pe samar rakhte haiñ

ye shajar maañ kī tarah dast-e-hunar rakhte haiñ

choñch-bhar daane liye jaate haiñ bachchoñ ke liye

ye parinde bhī kahāñ zād-e-safar rakhte haiñ

dhuup chaltī nahīñ saaya hai ki ruktā hī nahīñ

ham zamīñ vaale ajab shām-o-sahar rakhte haiñ

suukh jaate haiñ paḌe rahte haiñ tālāboñ meñ

ye kañval apnā alag tarz-e-basar rakhte haiñ

merī bastī meñ baḌī zaat ke rahte haiñ log

fikr-e-dastār nahīñ kāñdhoñ pe sar rakhte haiñ

dosto tīroñ kī āñkheñ to nahīñ hotīñ magar

phir bhī dushman ke Thikānoñ kī ḳhabar rakhte haiñ

ūñchī parvāz ho to jism kā jhaḌnā kaisā

ham parindoñ kī tarah bāl-e-hunar rakhte haiñ

aaj bhī pahle sā bachpan hai hamārā 'ehsān'

ham kitāboñ meñ abhī mor ke par rakhte haiñ

god mein panchhi to shaKHon pe samar rakhte hain

ye shajar man ki tarah dast-e-hunar rakhte hain

chonch-bhar dane liye jate hain bachchon ke liye

ye parinde bhi kahan zad-e-safar rakhte hain

dhup chalti nahin saya hai ki rukta hi nahin

hum zamin wale ajab sham-o-sahar rakhte hain

sukh jate hain paDe rahte hain talabon mein

ye kanwal apna alag tarz-e-basar rakhte hain

meri basti mein baDi zat ke rahte hain log

fikr-e-dastar nahin kandhon pe sar rakhte hain

dosto tiron ki aankhen to nahin hotin magar

phir bhi dushman ke Thikanon ki KHabar rakhte hain

unchi parwaz ho to jism ka jhaDna kaisa

hum parindon ki tarah baal-e-hunar rakhte hain

aaj bhi pahle sa bachpan hai hamara 'ehsan'

hum kitabon mein abhi mor ke par rakhte hain