gosha-e-dil mein koi phul khilae rakkho

gosha-e-dil meñ koī phuul khilā.e rakkho

ek ummīd pe āñgan ko sajā.e rakkho

ḳhushk pattoñ kī tarah asl se kaT jāoge

hai yahī achchhā use apnā banā.e rakkho

merā īmāñ hai use lauT ke ghar aanā hai

taaq meñ koī diyā roz jalā.e rakkho

yaad us kī to kisī taaq meñ rakhne kī nahīñ

ye sahīfa hai use dil se lagā.e rakkho

khul hī jā.egā koī bāb-e-ijābat 'sajjād'

apne hāthoñ ko ba-har-taur uThā.e rakkho

gosha-e-dil mein koi phul khilae rakkho

ek ummid pe aangan ko sajae rakkho

KHushk patton ki tarah asl se kaT jaoge

hai yahi achchha use apna banae rakkho

mera iman hai use lauT ke ghar aana hai

taq mein koi diya roz jalae rakkho

yaad us ki to kisi taq mein rakhne ki nahin

ye sahifa hai use dil se lagae rakkho

khul hi jaega koi bab-e-ijabat 'sajjad'

apne hathon ko ba-har-taur uThae rakkho