ghubar hoti sadi ke sahraon se ubharte hue zamane

ġhubār hotī sadī ke sahrāoñ se ubharte hue zamāne

na.e zamānoñ meñ aa.e tujh ko talāsh karte hue zamāne

udaas shāmoñ kī sard rātoñ meñ tere ushshāq dekhte haiñ

palak jhapakte hue darīchoñ meñ sub.h karte hue zamāne

agar ye sab kārobār-e-hastī tirī tavajjoh se haT gayā hai

to phir ye kis ne sambhāl rakkhe haiñ sab bikharte hue zamāne

bisāt-e-imkān par taġhayyur kā husn mohre badal rahā hai

charāġh-e-hairat kī lau meñ zinda haiñ raqs karte hue zamāne

zamīn sūraj ke gird apne madār meñ ghūmtī hai jaise

tirī galī kā tavāf karte haiñ yuuñ guzarte hue zamāne

ghubar hoti sadi ke sahraon se ubharte hue zamane

nae zamanon mein aae tujh ko talash karte hue zamane

udas shamon ki sard raaton mein tere ushshaq dekhte hain

palak jhapakte hue darichon mein subh karte hue zamane

agar ye sab karobar-e-hasti teri tawajjoh se haT gaya hai

to phir ye kis ne sambhaal rakkhe hain sab bikharte hue zamane

bisat-e-imkan par taghayyur ka husn mohre badal raha hai

charagh-e-hairat ki lau mein zinda hain raqs karte hue zamane

zamin suraj ke gird apne madar mein ghumti hai jaise

teri gali ka tawaf karte hain yun guzarte hue zamane