gudaz tak hi KHarabi hunar sambhaalega

gudāz tak hī ḳharābī hunar sambhālegā

ye ḳhāk-e-soḳhta kab kūza-gar sambhālegā

ḳhatar-pazīr huuñ us be-dilī meñ girya bhej

ye zalzala hī mire bām-o-dar sambhālegā

tū hī to ik sadaf-e-dil kī aabrū hai magar

ye aab kitne dinoñ tak guhar sambhālegā

ye dekhnā hai ki tūfān-e-regzār meñ tū

zamām-e-samt ki zād-e-safar sambhālegā

girānī-e-shab-e-ḳhāmosh-e-be-hisāb ke ba.ad

hisāb jitnā hai murġh-e-sahar sambhālegā

milāo ishq meñ kuchh rañj-e-rozgār se aab

bahut na bāda-e-ḳhālis jigar sambhālegā

gudaz tak hi KHarabi hunar sambhaalega

ye KHak-e-soKHta kab kuza-gar sambhaalega

KHatar-pazir hun us be-dili mein girya bhej

ye zalzala hi mere baam-o-dar sambhaalega

tu hi to ek sadaf-e-dil ki aabru hai magar

ye aab kitne dinon tak guhar sambhaalega

ye dekhna hai ki tufan-e-regzar mein tu

zamam-e-samt ki zad-e-safar sambhaalega

girani-e-shab-e-KHamosh-e-be-hisab ke baad

hisab jitna hai murgh-e-sahar sambhaalega

milao ishq mein kuchh ranj-e-rozgar se aab

bahut na baada-e-KHalis jigar sambhaalega