guftar badal kar kabhi kirdar badal kar

guftār badal kar kabhī kirdār badal kar

taqdīr meñ yuuñ jiit likhī haar badal kar

ab 'mīr' ke 'ġhālib' ke vo uslūb kahāñ haiñ

ash.ār kahe jaate haiñ me.aar badal kar

sar-dardī ke unvān sabhī meñ haiñ ba-kasrat

ham ne to yahī paayā hai aḳhbār badal kar

hotī hai har ik jang meñ kyoñ haar hamārī

dekho to kabhī qāfila sālār badal kar

taqdīr kī likhī huī tahrīr badal deñ

us shaḳhs ne baat apnī har ik baar badal kar

apnī bhī to raftār badal kar kabhī dekho

kyā hogā bhalā vaqt kī raftār badal kar

majbūr haiñ lāchār haiñ is daur meñ 'vājid'

laa.eñ kahāñ se ham dil-e-ḳhuddār badal kar

guftar badal kar kabhi kirdar badal kar

taqdir mein yun jit likhi haar badal kar

ab 'mir' ke 'ghaalib' ke wo uslub kahan hain

ashaar kahe jate hain mear badal kar

sar-dardi ke unwan sabhi mein hain ba-kasrat

hum ne to yahi paya hai aKHbar badal kar

hoti hai har ek jang mein kyon haar hamari

dekho to kabhi qafila salar badal kar

taqdir ki likhi hui tahrir badal den

us shaKHs ne baat apni har ek bar badal kar

apni bhi to raftar badal kar kabhi dekho

kya hoga bhala waqt ki raftar badal kar

majbur hain lachaar hain is daur mein 'wajid'

laen kahan se hum dil-e-KHuddar badal kar