gul-badan gul-pairahan ruh-e-chaman tum hi to ho

gul-badan gul-pairahan rūh-e-chaman tum hī to ho

jān-e-man ġhuncha-dahan shīrīñ-suḳhan tum hī to ho

gulshan-e-hastī kī ra.anā.ī tumhāre dam se hai

nargis-o-nasrīñ gulāb-o-yāsman tum hī to ho

merī izzat merī zillat sab tumhāre haath hai

maiñ barahna jism merā pairahan tum hī to ho

jis ko paane ke liye ahl-e-ḳhirad tarsā kiye

merā vo sarmāya vo dīvāna-pan tum hī to ho

koī samjhe yā na samjhe maiñ samajhtā huuñ zarūr

zindagī tum hī to ho dār-o-rasan tum hī to ho

saarī duniyā kī bahāreñ jis ke chehre par nisār

jis pe qurbāñ do-jahāñ kā bāñkpan tum hī to ho

maiñ tumhāre ishq meñ kāfir se momin ban gayā

merī nazroñ meñ hidāyat kī kiran tum hī to ho

kar diyā jis ne mujhe ahd-e-vafā se āshnā

jis ne baḳhshī pyaar kī mīThī chubhan tum hī to ho

raat kī tārīkiyoñ ko jis ne baḳhshī raushnī

chāñd tāroñ kī vo dilkash anjuman tum hī to ho

bhuul jaatā huuñ maiñ jis ko dekh kar har ġham 'shafī.a'

mere armānoñ kā vo zarrīñ gagan tum hī to ho

gul-badan gul-pairahan ruh-e-chaman tum hi to ho

jaan-e-man ghuncha-dahan shirin-suKHan tum hi to ho

gulshan-e-hasti ki ranai tumhaare dam se hai

nargis-o-nasrin gulab-o-yasman tum hi to ho

meri izzat meri zillat sab tumhaare hath hai

main barahna jism mera pairahan tum hi to ho

jis ko pane ke liye ahl-e-KHirad tarsa kiye

mera wo sarmaya wo diwana-pan tum hi to ho

koi samjhe ya na samjhe main samajhta hun zarur

zindagi tum hi to ho dar-o-rasan tum hi to ho

sari duniya ki bahaaren jis ke chehre par nisar

jis pe qurban do-jahan ka bankpan tum hi to ho

main tumhaare ishq mein kafir se momin ban gaya

meri nazron mein hidayat ki kiran tum hi to ho

kar diya jis ne mujhe ahd-e-wafa se aashna

jis ne baKHshi pyar ki miThi chubhan tum hi to ho

raat ki tarikiyon ko jis ne baKHshi raushni

chand taron ki wo dilkash anjuman tum hi to ho

bhul jata hun main jis ko dekh kar har gham 'shafia'

mere armanon ka wo zarrin gagan tum hi to ho