gul dekhna to chashm-e-gul-e-tar bhi dekhna

gul dekhnā to chashm-e-gul-e-tar bhī dekhnā

shabnam ne jo piro.e haiñ gauhar bhī dekhnā

sāhil se ho sakegā na andāza-e-sukūt

gahre samundaroñ meñ utar kar bhī dekhnā

hāthoñ meñ le ke phuul khaḌe haiñ jo raah meñ

tum par vahī uThā.eñge patthar bhī dekhnā

ye kyā ki apnī zaat ke andar hī gum rahe

ik roz apne aap se bāhar bhī dekhnā

phailānā chāhte ho agar paañv to suno

lāzim hai tum pe apnī ye chādar bhī dekhnā

jī bhar ke jab bahār kī rut dekh lo to phir

ujḌī huī rutoñ ke ye manzar bhī dekhnā

'zaiġham' hazār raunaq-e-mahfil bhalī sahī

tanhā.ī jo uThā.egī mahshar bhī dekhnā

gul dekhna to chashm-e-gul-e-tar bhi dekhna

shabnam ne jo piroe hain gauhar bhi dekhna

sahil se ho sakega na andaza-e-sukut

gahre samundaron mein utar kar bhi dekhna

hathon mein le ke phul khaDe hain jo rah mein

tum par wahi uThaenge patthar bhi dekhna

ye kya ki apni zat ke andar hi gum rahe

ek roz apne aap se bahar bhi dekhna

phailana chahte ho agar panw to suno

lazim hai tum pe apni ye chadar bhi dekhna

ji bhar ke jab bahaar ki rut dekh lo to phir

ujDi hui ruton ke ye manzar bhi dekhna

'zaigham' hazar raunaq-e-mahfil bhali sahi

tanhai jo uThaegi mahshar bhi dekhna