gul-e-nau ke hath se dam-ba-dam jo saba nikalti chali gai

gul-e-nau ke haath se dam-ba-dam jo sabā nikaltī chalī ga.ī

to chaman chaman thī vo tishnagī ki bahār jaltī chalī ga.ī

maiñ musāfir-e-rah-e-dard thā har umiid dast-e-savāl thī

ye hayāt mauj-e-sarāb thī mire saath chaltī chalī ga.ī

tirī yaad gulshan-e-ḳhvāb thī ki mirī navāoñ ke dasht meñ

ye bahār-e-sham’-e-ḳhayāl thī sar-e-shāḳh jaltī chalī ga.ī

tirī aarzū to na thī magar tū kahāñ hai mere nigār sun

tirī justujū ke baġhair bhī rah-e-dil badaltī chalī ga.ī

tire gesuoñ kī kahāniyāñ jo sunīñ to niiñd sī aa chalī

safar-e-hayāt meñ saḳht thī mirī raat Dhaltī chalī ga.ī

nazar aa.ī manzil-e-ārzū to har ik nasheb-o-farāz par

ye qadam bahakte chale ga.e vo nazar sañbhaltī chalī ga.ī

gul-e-nau ke hath se dam-ba-dam jo saba nikalti chali gai

to chaman chaman thi wo tishnagi ki bahaar jalti chali gai

main musafir-e-rah-e-dard tha har umid dast-e-sawal thi

ye hayat mauj-e-sarab thi mere sath chalti chali gai

teri yaad gulshan-e-KHwab thi ki meri nawaon ke dasht mein

ye bahaar-e-sham’-e-KHayal thi sar-e-shaKH jalti chali gai

teri aarzu to na thi magar tu kahan hai mere nigar sun

teri justuju ke baghair bhi rah-e-dil badalti chali gai

tere gesuon ki kahaniyan jo sunin to nind si aa chali

safar-e-hayat mein saKHt thi meri raat Dhalti chali gai

nazar aai manzil-e-arzu to har ek nasheb-o-faraaz par

ye qadam bahakte chale gae wo nazar sanbhalti chali gai