gul-e-rangin mah-e-kaamil kahan hai

gul-e-rañgīñ mah-e-kāmil kahāñ hai

mujhe āvāz de ai dil kahāñ hai

hai ḳhud gumrāh aql-e-maslahat meñ

junūñ se pūchhiye manzil kahāñ hai

har ik shai is muhīt-e-zindagī meñ

fareb-e-mauj hai sāhil kahāñ hai

na iThlā ai nasīm-e-sub.h-gāhī

ḳhudā jaane mirā ab dil kahāñ hai

dar-e-māzī jabīn-e-hāl kab tak

batā ai mere mustaqbil kahāñ hai

na ma.alūm ai sukūn-e-kāmrānī

vo lutf-e-sa.ī-e-lā-hāsil kahāñ hai

bahār aa.egī ashk-e-sāda-rū par

abhī ḳhūn-e-jigar shāmil kahāñ hai

vo dil jis ko mayassar hai huzūrī

asīr-e-bazm-e-āb-o-gil kahāñ hai

jise samjhā hai 'faiz' ā.īna-e-haq

vo be-aks-e-ruḳh-e-bātil kahāñ hai

gul-e-rangin mah-e-kaamil kahan hai

mujhe aawaz de ai dil kahan hai

hai KHud gumrah aql-e-maslahat mein

junun se puchhiye manzil kahan hai

har ek shai is muhit-e-zindagi mein

fareb-e-mauj hai sahil kahan hai

na iThla ai nasim-e-subh-gahi

KHuda jaane mera ab dil kahan hai

dar-e-mazi jabin-e-haal kab tak

bata ai mere mustaqbil kahan hai

na malum ai sukun-e-kaamrani

wo lutf-e-sai-e-la-hasil kahan hai

bahaar aaegi ashk-e-sada-ru par

abhi KHun-e-jigar shamil kahan hai

wo dil jis ko mayassar hai huzuri

asir-e-bazm-e-ab-o-gil kahan hai

jise samjha hai 'faiz' aaina-e-haq

wo be-aks-e-ruKH-e-baatil kahan hai