gul ki chaTak pe os ne angDai toD di

gul kī chaTak pe os ne añgḌā.ī toḌ dī

naġhma-sarā-e-ḳhvāb ne shahnā.ī toḌ dī

chaspāñ the us pe hijr ke aḳhbār-e-be-zabāñ

tū ne vo khiḌkī kaise mire bhaa.ī toḌ dī

sote the jis ko rakh ke sirhāne tire faqīr

kis ne vo ḳhisht-e-qil'a-e-chuġhtā.ī toḌ dī

ik ārzū-e-jur'a-e-ḳhūñ se girafta-jāñ

mīnā-e-ḳhām thī dil-e-saudā.ī toḌ dī

vahshat ḳhabar hai ḳhāna-e-dil ke makīn ne

dīvār-o-dar se rasm-e-shanāsā.ī toḌ dī

go is 'amal se TuuT ga.e ustuḳhvāñ magar

zanjīr se ḳhamoshī-e-tanhā.ī toḌ dī

gul ki chaTak pe os ne angDai toD di

naghma-sara-e-KHwab ne shahnai toD di

chaspan the us pe hijr ke aKHbar-e-be-zaban

tu ne wo khiDki kaise mere bhai toD di

sote the jis ko rakh ke sirhane tere faqir

kis ne wo KHisht-e-qil'a-e-chughtai toD di

ek aarzu-e-jur'a-e-KHun se girafta-jaan

mina-e-KHam thi dil-e-saudai toD di

wahshat KHabar hai KHana-e-dil ke makin ne

diwar-o-dar se rasm-e-shanasai toD di

go is 'amal se TuT gae ustuKHwan magar

zanjir se KHamoshi-e-tanhai toD di