gul ne jab iKHtiyar ki aawaz

gul ne jab iḳhtiyār kī āvāz

aur mahkī bahār kī āvāz

kab suneñgī hamāre rishtoñ kī

sūkhī shāḳheñ bahār kī āvāz

aane vaalā hai kaun sā mausam

gul se aatī hai ḳhaar kī āvāz

pattharoñ par asar nahīñ kartī

jhiil dariyā chinār kī āvāz

jaane kis samt kis samundar meñ

so ga.ī ābshār kī āvāz

kar ga.ī hai samā'ateñ majrūh

TūTte e'tibār kī āvāz

kal inhīñ bām-o-dar se aa.egī

mere naqsh-o-nigār kī āvāz

ab to aane lagī hai āñkhoñ se

niiñd ke intizār kī āvāz

tū muqarrir hai kis zamāne kā

tujh se aatī hai daar kī āvāz

ḳhanjaroñ ke badal ga.e lahje

ik ġharīb-ud-dayār kī āvāz

qāfile kā patā batā.e kaun

chup hai sahrā ġhubār kī āvāz

tere har she'r kā hai ai 'kāzim'

harf-e-tanhā hazār kī āvāz

gul ne jab iKHtiyar ki aawaz

aur mahki bahaar ki aawaz

kab sunengi hamare rishton ki

sukhi shaKHen bahaar ki aawaz

aane wala hai kaun sa mausam

gul se aati hai KHar ki aawaz

pattharon par asar nahin karti

jhil dariya chinar ki aawaz

jaane kis samt kis samundar mein

so gai aabshaar ki aawaz

kar gai hai sama'aten majruh

TuTte e'tibar ki aawaz

kal inhin baam-o-dar se aaegi

mere naqsh-o-nigar ki aawaz

ab to aane lagi hai aankhon se

nind ke intizar ki aawaz

tu muqarrir hai kis zamane ka

tujh se aati hai dar ki aawaz

KHanjaron ke badal gae lahje

ek gharib-ud-dayar ki aawaz

qafile ka pata batae kaun

chup hai sahra ghubar ki aawaz

tere har she'r ka hai ai 'kazim'

harf-e-tanha hazar ki aawaz