gul-o-bulbul ke jhagDon ko sar-e-gulzar rahne de

gul-o-bulbul ke jhagḌoñ ko sar-e-gulzār rahne de

hikāyat merī sun le qissa-e-bekār rahne de

dil-e-āshiq meñ apne ishq kā āzār rahne de

mire pahlū meñ ye tīr-e-jigar-afgār rahne de

sunā tū ne nahīñ kyā tuur par muusā kā ġhash khānā

tamanna apnī dil meñ tālib-e-dīdār rahne de

pasand aatī hai ye terī adā jāñ-bāz-e-ulfat ko

sitamgar tū abhī zeb-e-kamar talvār rahne de

tujhe va.ade kī shab sūjhī hinā-bandī kī kyoñ sūjhī

ye hiile ye bahāne mujh se ai ayyār rahne de

tire kushte to lākhoñ jā chuke gor-e-ġharībāñ ko

mirī mayyat to ai zālim pas-e-dīvār rahne de

gul-o-bulbul ke jhagDon ko sar-e-gulzar rahne de

hikayat meri sun le qissa-e-bekar rahne de

dil-e-ashiq mein apne ishq ka aazar rahne de

mere pahlu mein ye tir-e-jigar-afgar rahne de

suna tu ne nahin kya tur par musa ka ghash khana

tamanna apni dil mein talib-e-didar rahne de

pasand aati hai ye teri ada jaan-baz-e-ulfat ko

sitamgar tu abhi zeb-e-kamar talwar rahne de

tujhe wade ki shab sujhi hina-bandi ki kyon sujhi

ye hile ye bahane mujh se ai ayyar rahne de

tere kushte to lakhon ja chuke gor-e-ghariban ko

meri mayyat to ai zalim pas-e-diwar rahne de