gulon ke sho’la-sifat manzaron mein chhup sa gaya

guloñ ke sho’la-sifat manzaroñ meñ chhup sā gayā

vo dublā-patlā badan ḳhushbuoñ meñ chhup sā gayā

suhāne ḳhvāboñ kā ik shahr shaam hote hī

jale charāġh to parchhā.iyoñ meñ chhup sā gayā

gale lagā rahā zulmat ke rāt-bhar koī

sahar huī to khule bāzuoñ meñ chhup sā gayā

na jaane kaun se dariyā se jā milīñ lahreñ

lahū kā shor phaḌaktī ragoñ meñ chhup sā gayā

kisī ke naqsh-e-kaf-e-pā dikhā.ī kyā dete

vo sang-e-mīl hī jab rāstoñ meñ chhup sā gayā

galī meñ ret ke āñgan kā kuchh pata na chalā

bagūlā uḌte hue kāġhazoñ meñ chhup sā gayā

karāhte hue lamhoñ ko chhoḌ kar ai 'shād'

kisī kī chaah kā din parbatoñ meñ chhup sā gayā

gulon ke sho’la-sifat manzaron mein chhup sa gaya

wo dubla-patla badan KHushbuon mein chhup sa gaya

suhane KHwabon ka ek shahr sham hote hi

jale charagh to parchhaiyon mein chhup sa gaya

gale laga raha zulmat ke raat-bhar koi

sahar hui to khule bazuon mein chhup sa gaya

na jaane kaun se dariya se ja milin lahren

lahu ka shor phaDakti ragon mein chhup sa gaya

kisi ke naqsh-e-kaf-e-pa dikhai kya dete

wo sang-e-mil hi jab raston mein chhup sa gaya

gali mein ret ke aangan ka kuchh pata na chala

bagula uDte hue kaghazon mein chhup sa gaya

karahte hue lamhon ko chhoD kar ai 'shad'

kisi ki chah ka din parbaton mein chhup sa gaya