gulon ko chum kar aai saba si lagti thi

guloñ ko chuum kar aa.ī sabā sī lagtī thī

thī ik nazar pe mo.attar havā sī lagtī thī

maiñ zaḳhm zaḳhm thā lekin gulāb hāthoñ meñ

baḌī thī choT to lekin zarā sī lagtī thī

vo tursh-go lab-e-jāñ-baḳhsh bhī thā kyā kahiye

ki talḳh baat bhī us kī davā sī lagtī thī

sitam ko husn-e-sitam kar gayā vahī varna

yahī thī zindagī lekin sazā sī lagtī thī

mirī taḌap ko samajhtā thā ik ibādat vo

mujhe bhī us kī mohabbat duā sī lagtī thī

chalo vo aañkh meñ paanī to de gayā varna

ye saañs andhe kueñ meñ sadā sī lagtī thī

gulon ko chum kar aai saba si lagti thi

thi ek nazar pe moattar hawa si lagti thi

main zaKHm zaKHm tha lekin gulab hathon mein

baDi thi choT to lekin zara si lagti thi

wo tursh-go lab-e-jaan-baKHsh bhi tha kya kahiye

ki talKH baat bhi us ki dawa si lagti thi

sitam ko husn-e-sitam kar gaya wahi warna

yahi thi zindagi lekin saza si lagti thi

meri taDap ko samajhta tha ek ibaadat wo

mujhe bhi us ki mohabbat dua si lagti thi

chalo wo aankh mein pani to de gaya warna

ye sans andhe kuen mein sada si lagti thi