gulon mein rang kahan hai tere badan ki tarah

guloñ meñ rang kahāñ hai tire badan kī tarah

tirā badan hai sitāroñ kī anjuman kī tarah

vahī jo log the āvāra be-vatan kī tarah

unhīñ ke dam se bayābāñ huā chaman kī tarah

ye hai fareb-e-nazar yā bahār kā mausam

sajā huā hai gulistāñ mirā dulhan kī tarah

junūn-e-shauq mirā kāmyāb ho hī gayā

lage hai mujh ko bayābāñ bhī ab chaman kī tarah

vo zindagī to nahīñ zindagī kā mātam hai

jo zindagī ho vatan hī meñ be-vatan kī tarah

shab-e-firāq hai ġham hai ḳhalish hai aañsū hai

mirī hayāt hai tanhā bhī anjuman kī tarah

jahāñ bhī maiñ ne qadam apnā rakh diyā 'muḳhtār'

mahak uThe vahīñ kāñTe bhī nastaran kī tarah

gulon mein rang kahan hai tere badan ki tarah

tera badan hai sitaron ki anjuman ki tarah

wahi jo log the aawara be-watan ki tarah

unhin ke dam se bayaban hua chaman ki tarah

ye hai fareb-e-nazar ya bahaar ka mausam

saja hua hai gulistan mera dulhan ki tarah

junun-e-shauq mera kaamyab ho hi gaya

lage hai mujh ko bayaban bhi ab chaman ki tarah

wo zindagi to nahin zindagi ka matam hai

jo zindagi ho watan hi mein be-watan ki tarah

shab-e-firaq hai gham hai KHalish hai aansu hai

meri hayat hai tanha bhi anjuman ki tarah

jahan bhi main ne qadam apna rakh diya 'muKHtar'

mahak uThe wahin kanTe bhi nastaran ki tarah