gulon mein rang nahin mausam-e-bahaar nahin

guloñ meñ rang nahīñ mausam-e-bahār nahīñ

mirī hayāt magar phir bhī sogvār nahīñ

hai daur-e-ishq yahāñ jabr-o-iḳhtiyār nahīñ

sukūn-e-dil ke liye koī be-qarār nahīñ

yahī urūj-e-mohabbat yahī usūl-e-vafā

kisī sahar ke liye shām-e-intizār nahīñ

ġham-o-ḳhushī to yahāñ aate jaate rahte haiñ

magar ye ziist kā ai dost e'tibār nahīñ

har ek shai meñ usī kā jamāl hai maujūd

dil-o-nazar ko mirī koī intishār nahīñ

ilāhī baḳhsh de har ek ke gunāhoñ ko

vo kaun hai jo tire aage sharmsār nahīñ

'nasīm' aa ke pareshāñ hai aise sahrā meñ

jahāñ na āb-o-giyāh gul nahīñ hai ḳhaar nahīñ

gulon mein rang nahin mausam-e-bahaar nahin

meri hayat magar phir bhi sogwar nahin

hai daur-e-ishq yahan jabr-o-iKHtiyar nahin

sukun-e-dil ke liye koi be-qarar nahin

yahi uruj-e-mohabbat yahi usul-e-wafa

kisi sahar ke liye sham-e-intizar nahin

gham-o-KHushi to yahan aate jate rahte hain

magar ye zist ka ai dost e'tibar nahin

har ek shai mein usi ka jamal hai maujud

dil-o-nazar ko meri koi intishaar nahin

ilahi baKHsh de har ek ke gunahon ko

wo kaun hai jo tere aage sharmsar nahin

'nasim' aa ke pareshan hai aise sahra mein

jahan na aab-o-giyah gul nahin hai KHar nahin