gulon par saf dhoka ho gaya rangin kaTori ka

guloñ par saaf dhokā ho gayā rañgīñ kaTorī kā

rag-e-gul meñ jo aalam thā tirī añgiyā kī Dorī kā

barābar ek se misre nazar aate haiñ abrū ke

tavārud kahiye yā hai ek meñ mazmūn chorī kā

bahut ġham khāte khāte ik-na-ik din jaan jā.egī

zarar rakhtā hai ai dilbar natīja ser-ḳhorī kā

huā hai ham ko ik mutrib pisar kī zulf kā saudā

hamārā shor-e-vahshat bhī ye ik paTTā hai shorī kā

ḳhafā ho gāliyāñ do chāho aane do na aane do

maiñ bose lūñgā sote meñ mujhe lapkā hai chorī kā

agar tum bosa-e-seb-e-zaqan se ho ga.e qātil

gale par pher diije mere chāqū meva-ḳhorī kā

koī shaidā-e-āriz hai koī zulfoñ kā dīvāna

kisī ko ishq kaalī kā koī āshiq hai gorī kā

kahīñ ho achchhī sūrat dekh luuñ dīdār nazroñ se

mirī āñkhoñ ko choroñ kī tarah lapkā hai chorī kā

misī-ālūd lab chūse jo us ke balbe shīrīnī

mazā aayā mire muñh meñ siyah ponDe kī puurī kā

shab-e-ġham meñ fuġhāñ kartā huuñ jab tham jaate haiñ aañsū

tamāshā dekho tifl-e-ashk bhī ḳhūgar hai lorī kā

na bāñdho sher meñ duzd-e-hinā kā ai 'qalaq' mazmūñ

kahegā yaar shoḳhī se ye hai mazmūn chorī kā

gulon par saf dhoka ho gaya rangin kaTori ka

rag-e-gul mein jo aalam tha teri angiya ki Dori ka

barabar ek se misre nazar aate hain abru ke

tawarud kahiye ya hai ek mein mazmun chori ka

bahut gham khate khate ik-na-ik din jaan jaegi

zarar rakhta hai ai dilbar natija ser-KHori ka

hua hai hum ko ek mutrib pisar ki zulf ka sauda

hamara shor-e-wahshat bhi ye ek paTTa hai shori ka

KHafa ho galiyan do chaho aane do na aane do

main bose lunga sote mein mujhe lapka hai chori ka

agar tum bosa-e-seb-e-zaqan se ho gae qatil

gale par pher dije mere chaqu mewa-KHori ka

koi shaida-e-ariz hai koi zulfon ka diwana

kisi ko ishq kali ka koi aashiq hai gori ka

kahin ho achchhi surat dekh lun didar nazron se

meri aankhon ko choron ki tarah lapka hai chori ka

misi-alud lab chuse jo us ke balbe shirini

maza aaya mere munh mein siyah ponDe ki puri ka

shab-e-gham mein fughan karta hun jab tham jate hain aansu

tamasha dekho tifl-e-ashk bhi KHugar hai lori ka

na bandho sher mein duzd-e-hina ka ai 'qalaq' mazmun

kahega yar shoKHi se ye hai mazmun chori ka