gulon pe saya-e-gham-ha-e-rozgar mile

guloñ pe sāya-e-ġham-hā-e-rozgār mile

bharī bahār ke chehre bhī sogvār mile

sajā de un ke garebāñ ko māh-o-anjum se

hamāre dast-e-junūñ ko jo iḳhtiyār mile

hazār daaġh uThā kar chaman khilātī hai

kahīñ zamīñ ko jo ahl-e-zamīñ kā pyaar mile

hamāre paas hai kyā daulat-e-junūñ ke sivā

nisār chaak garebāñ agar bahār mile

ye vāqi.a hai ki nāseh kī zid meñ baat baḌhī

jo ek baar na milte vo bār-bār mile

mizha ke ashk tamannā ke zaḳhm yaad ke phuul

ka.ī charāġh sar-e-shām-e-intizār mile

sahar se dair o haram par jo bahs karte haiñ

vo mai-kade meñ sar-e-shām ham-kanār mile

ham apne chehra-e-fan kā nikhār kyā dekheñ

ki aa.ine bhī to ālūda-e-ġhubār mile

sunīñ to ābla-pā.ī kī dāstāñ lekin

kahāñ 'shamīm' sā āshufta-e-bahār mile

gulon pe saya-e-gham-ha-e-rozgar mile

bhari bahaar ke chehre bhi sogwar mile

saja de un ke gareban ko mah-o-anjum se

hamare dast-e-junun ko jo iKHtiyar mile

hazar dagh uTha kar chaman khilati hai

kahin zamin ko jo ahl-e-zamin ka pyar mile

hamare pas hai kya daulat-e-junun ke siwa

nisar chaak gareban agar bahaar mile

ye waqia hai ki naseh ki zid mein baat baDhi

jo ek bar na milte wo bar-bar mile

mizha ke ashk tamanna ke zaKHm yaad ke phul

kai charagh sar-e-sham-e-intizar mile

sahar se dair o haram par jo bahs karte hain

wo mai-kade mein sar-e-sham ham-kanar mile

hum apne chehra-e-fan ka nikhaar kya dekhen

ki aaine bhi to aaluda-e-ghubar mile

sunin to aabla-pai ki dastan lekin

kahan 'shamim' sa aashufta-e-bahaar mile