gulshan ka sana-KHwan hun bayaban mein paDa hun

gulshan kā sanā-ḳhvāñ huuñ bayābāñ meñ paḌā huuñ

taa.ir huuñ magar gosha-e-zindāñ meñ paḌā huuñ

huuñ muntazir-e-qāfila-e-misr-e-tamannā

yūsuf huuñ abhī chāh-e-bayābāñ meñ paḌā huuñ

miltā nahīñ bāzār se pairāhan-e-yūsuf

yāqūb huuñ tārīkī-e-kan.āñ meñ paḌā huuñ

āñkhoñ pe hai ik manzar-e-kam-dīda kā parda

maiñ kab se tirī yaad ke zindāñ meñ paḌā huuñ

tū hai ki mujhe duur se kartā hai ishāre

maiñ huuñ ki rah-e-husn-e-gurezāñ meñ paḌā huuñ

maanā ki nahīñ 'arsh' koī gosh-bar-āvāz

kyā kam hai ki maiñ kūcha-e-jānāñ meñ paḌā huuñ

gulshan ka sana-KHwan hun bayaban mein paDa hun

tair hun magar gosha-e-zindan mein paDa hun

hun muntazir-e-qafila-e-misr-e-tamanna

yusuf hun abhi chah-e-bayaban mein paDa hun

milta nahin bazar se pairahan-e-yusuf

yaqub hun tariki-e-kanan mein paDa hun

aankhon pe hai ek manzar-e-kam-dida ka parda

main kab se teri yaad ke zindan mein paDa hun

tu hai ki mujhe dur se karta hai ishaare

main hun ki rah-e-husn-e-gurezan mein paDa hun

mana ki nahin 'arsh' koi gosh-bar-awaz

kya kam hai ki main kucha-e-jaanan mein paDa hun