gulshan mein bandobast ba-rang-e-digar hai aaj

gulshan meñ bandobast ba-rañg-e-digar hai aaj

qumrī kā tauq halqa-e-bairūn-e-dar hai aaj

aatā hai ek pāra-e-dil har fuġhāñ ke saath

tār-e-nafas kamand-e-shikār-e-asar hai aaj

ai āfiyat kināra kar ai intizām chal

sailāb-e-girya darpai-e-dīvār-o-dar hai aaj

ma.azūlī-e-tapish huī ifrāt-e-intizār

chashm-e-kushāda halqa-e-bairūn-e-dar hai aaj

hairat-farosh-e-sad-nigarānī hai iztirār

sar-rishta chāk-e-jeb kā tār-e-nazar hai aaj

huuñ dāġh-e-nīm-rañgī-e-shām-e-visāl-e-yār

nūr-e-charāġh-e-bazm se josh-e-sahar hai aaj

kartī hai ājizī-e-safar soḳhtan tamām

pairāhan-e-ḳhasak meñ ġhubār-e-sharar hai aaj

tā-sub.h hai ba-manzil-e-maqsad rasīdanī

dūd-e-charāġh-e-ḳhāna ġhubār-e-safar hai aaj

dūr-ūftāda-e-chaman-e-fikr hai 'asad'

murġh-e-ḳhayāl bulbul-e-be-bāl-o-par hai aaj

gulshan mein bandobast ba-rang-e-digar hai aaj

qumri ka tauq halqa-e-bairun-e-dar hai aaj

aata hai ek para-e-dil har fughan ke sath

tar-e-nafas kamand-e-shikar-e-asar hai aaj

ai aafiyat kinara kar ai intizam chal

sailab-e-girya darpai-e-diwar-o-dar hai aaj

mazuli-e-tapish hui ifraat-e-intizar

chashm-e-kushada halqa-e-bairun-e-dar hai aaj

hairat-farosh-e-sad-nigarani hai iztirar

sar-rishta chaak-e-jeb ka tar-e-nazar hai aaj

hun dagh-e-nim-rangi-e-sham-e-visal-e-yar

nur-e-charagh-e-bazm se josh-e-sahar hai aaj

karti hai aajizi-e-safar soKHtan tamam

pairahan-e-KHasak mein ghubar-e-sharar hai aaj

ta-subh hai ba-manzil-e-maqsad rasidani

dud-e-charagh-e-KHana ghubar-e-safar hai aaj

dur-uftada-e-chaman-e-fikr hai 'asad'

murgh-e-KHayal bulbul-e-be-baal-o-par hai aaj